შვედეთის პრემიერ-მინისტრი თვითიზოლაციაშია

შვედეთის პრემიერ-მინისტრი თვითიზოლაციაშია. სტეფან ლევენის ახლო კონტაქტს კორონავირუსი დაუდასტურდა და მთავრობის მეთაური ქვეყანაში დაწესებული ნორმების თანახმად მეუღლესთან ერთად რამდენიმე დღეს იზოლაციაში გაატარებს.

პრემიერი დისტანციურად განაგრძობს მუშაობას. ამ ეტაპზე პრემიერ-მინისტრს კორონავირუსის სიმპტომები არ აღენიშნება. მთავრობის მეთაურმა განაცხადა, რომ ქვეყანაში ეპიდემიოლოგიური ვითარება სწრაფი ტემპით უარესდება.

შვედეთმა ვირუსის გავრცელების შესამცირებლად მიმდინარე კვირას შეზღუდვები დააწესა. კაფეებსა და რესტორნებში ერთ მაგიდასთან მხოლოდ 8 ადამიანის შეკრებაა ნებადართული. პრემიერ-მინისტრმა უფრო მკაცრი რეკომენდაციებით მიმართა შვედეთის სამ რეგიონს, სადაც მოსახლეობას სთხოვენ, თავი აარიდონ საზოგადოებრივი ტრანსპორტით სარგებლობას.

ქვეყნის ჯანდაცვის მინისტრმა განაცხადა, რომ ნაციონალურ და რეგიონულ დონეზე დაწესებული ნებაყოფლობითი რეკომენდაციების პატივისცემის შემთხვევაში შვედეთში შესაძლოა ვირუსის სწრაფად გავრცელება ისევ შემცირდეს და გაზაფხულის მსგავსად ლოკდაუნის დაწესება საჭირო არ გახდეს. შვედეთში 70 წელს ზემოთ მოქალაქეებს და მაღალი რისკის ჯგუფებში მყოფებს უსაფრთხოების მიზნით ურჩიეს, თავი აარიდონ ნემისმიერ კონტაქტს, გარდა იმ ადამიანებისა, ვისთან ერთადაც პანდემიისას ცხოვრობენ.

ხელისუფლება მოსახლეობას, სიმპტომების გამოვლენის შემთხვევაში სახლში დარჩენას, ჰიგიენის დაცვას და დროებით თავშეყრის ადგილებში სიარულისგან თავის შეკავებას ურჩევს. შვედეთში კორონავირუსის პირველი ტალღის დროსაც არ გამოცხადებულა ლოკდაუნი. ქვეყანაში დღემდე არ არის სავალდებულო პირბადის ტარება.

„ჩვენი რეკომენდაცია არ არის პირბადის ტარება საზოგადოებრივი თავშეყრის ადგილებში, რადგან ვირუსის წინააღმდეგ ბრძოლაში პირბადის ტარების ეფექტიანობის შესახებ მეცნიერულ დონეზე არ არის მკაფიო მტკიცებულებები. მათ ტარების ეფექტიანობაზე არასაკმარისი ცოდნის მიუხედავად, შესაძლოა იყოს სიტუაციები, როდესაც პირბადის ტარება სასარგებლოა. მაგალითად, ვიზიტი ოფთალმოლოგთან ან საზოგადოებრივ ტრანსპორტში, როდესაც ხალხმრავლობის თავიდან აცილება და დისტანციის დაცვა ვერ ხერხდება”, - წერია შვედეთის საზოგადოებრივი ჯანდაცის სააგენტოს ოფიციალურ საიტზე.

3 ნოემბერს, შვედეთში დაფიქსირდა 2807 ახალი შემთხვევა და დაიღუპა ერთი ადამიანი. 4 ნოემბერს გარდაიცვალა 13 პაციენტი. პანდემიის დაწყებიდან დღემდე შვედეთში აღრიცხულია ინფიცირების 137 730 შემთხვევა. დღესდღეობით აქტიურია 109 403 შემთხვევა. კრიტიკულია 73 ადამიანის ჯანმრთელობის მდგომარეობა. შვედეთის მოსახლეობა 2019 წლის მონაცემებით 10 343 403-ს შეადგენს. ბოლო 9 თვეში COVID19-ზე ქვეყანაში 2 242 469 ტესტი ჩატარდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ მიიჩნია. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.