ომბუდსმენი შექმნილ მძიმე ეპიდემიოლოგიურ ვითარებასა და მიმდინარე საპროტესტო აქციებთან დაკავშირებით საგანგებო მიმართვას ავრცელებს

ქვეყანაში შექმნილი ეპიდემიოლოგიური მდგომარეობის გამო, საქართველოს სახალხო დამცველი განცხადებას ავრცელებს და ხელისუფლებას, საარჩევნო ადმინისტრაციას, ოპოზიციურ პარტიებსა და მოსახლეობას რეკომენდაციით მიმართავს.

ომბუდსმენი, საქართველოს მთავრობას, დაინფიცირების ტემპის შენელების მიზნით, მოუწოდებს, უზრუნველყოს უკვე დადგენილი ყველა პრევენციული ღონისძიების ეფექტური აღსრულება.

ამასთან, სახალხო დამცველი მიიჩნევს, რომ საარჩევნო ადმინისტრაციებმა, სამართლიანი და გამჭვირვალე პროცედურების დაცვით, დროულად უნდა განიხილონ არჩევნებთან დაკავშირებული დასაბუთებული საჩივრები და უზრუნველყონ სადავო საარჩევნო უბნების შედეგების გადათვლა. ომბუდსმენის შეფასებით, ეს მნიშვნელოვნად შეამცირებს საარჩევნო ადმინისტრაციების გარეთ მიმდინარე მწვავე საპროტესტო აქციებს და შესაბამისად - მოსახლეობის მობილობას.

სახალხო დამცველი ოპოზიციურ პოლიტიკურ პარტიებს მოუწოდებს, „შექმნილი ძალიან მძიმე ეპიდემიოლოგიური მდგომარეობის გათვალისწინებით, საპროტესტო აქციების ორგანიზების პროცესში უზრუნველყონ ვირუსის გავრცელების პრევენციისთვის დადგენილი ყველა წესისა და შეზღუდვის განუხრელად დაცვა, რაც შეამცირებს ზიანს ადამიანების ჯანმრთელობისა და სიცოცხლის მიმართ“.

ამასთან, სახალხო დამცველი მოუწოდებს საქართველოში მცხოვრებ ყველა პირს, შეასრულონ ის მოთხოვნები და რეკომენდაციები, რომლებიც უკავშირდება კარანტინსა და თვითიზოლაციას; ასევე პირბადით სწორად სარგებლობას, მათ შორის, უკვე ღია სივრცეებში, ჰიგიენური წესების და სოციალური დისტანციის დაცვას. ომბუდსმენის აპარატის მიერ გავრცელებულ განცხადებაში აღნიშნულია, რომ ეს დღეისთვის ერთადერთი და ყველაზე ეფექტური გზაა საკუთარი და სხვა ადამიანების ჯანმრთელობისა და სიცოცხლის უფლების დასაცავად.

ამ დროისთვის საქართველოში კორონავირუსის 51 993 შემთხვევაა დადასტურებული. გამოჯანმრთელებულთა რაოდენობა 37 019-ს შეადგენს. გარდაიცვალა 423 მოქალაქე. უცხოეთიდან სამკურნალოდ გადმოყვანილია საქართველოს 41 მოქალაქე.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.