დღე-ღამეში, ანტიგენით ტესტირების შედეგად, კოვიდინფიცირების 1 400 შემთხვევა გამოვლინდა

გუშინ იყო პირველი დღე, როდესაც დავიწყეთ გაფართოებული ინტენსიური ტესტირება ანტიგენ ტესტებით. ანტიგენით ტესტირებულთა შორის, 1 400 შემთხვევა დაფიქსირდა. ანტიგენით ტესტირებას ექვემდებარებიან ის პირები, ვისაც აქვთ სიმპტომები. ტესტი საკმაოდ მაღალი ხარისხისაა, - ამის შესახებ მთავრობის სხდომის შემდეგ გამართულ ბრიფინგზე ჯანდაცვის მინისტრის მოადგილემ, თამარ გაბუნიამ განაცხადა.

„ამ შემთხვევაში, რა თქმა უნდა, პირველი კონტაქტია ოჯახის ექიმი. მისი რჩევით, მოქალაქეს შეუძლია, მიმართოს სამედიცინო დაწესებულებას. ეს შეიძლება იყოს პირველადი ჯანდაცვის ცენტრი, საოჯახო მედიცინის ცენტრი, პოლიკლინიკა. იზრდება იმ პოლიკლინიკების რაოდენობა, რომლებიც ჩართულნი არიან პროგრამაში. ძალიან მნიშვნელოვანია სწრაფი დიაგნოსტიკა. დადასტურებული პირები უნდა დარჩნენ ბინაზე. მათ დაუკავშირდებათ ოჯახის ექიმი, ისევე, როგორც ეს სხვა შემთხვევაში ხდება. დღეს პაციენტი პასუხს სწრაფად იღებს და ხშირ შემთხვევაში, იქვე უჩნდება კითხვა, თუ როგორ უნდა მოიქცეს. გუშინ ძალიან ბევრი ზარი განხორციელდა 112-ში. ამ შემთხვევაში, 112-ში დარეკვა საჭირო არაა, ოჯახის ექიმთან კომუნიკაციაა აუცილებელი“, - განაცხადა თამარ გაბუნიამ.

მისივე განცხადებით, 3 დეკემბერს ანტიგენით და PCR ტესტებით ტესტირებულთა რაოდენობამ 17 ათასი შეადგინა.

ანტიგენის ტესტი ვირუსს აქტიურ ფაზაში ავლენს. აღნიშნული ტესტირებისას, ბიოლოგიურ მასალას ცხვირიდან იღებენ და პასუხისთვის 20-30 წუთია საჭირო.

საქართველოში კორონავირუსი კიდევ 5 068 ადამიანს დაუდასტურდა, 38 ინფიცირებული გარდაიცვალა, ხოლო 2 336 პაციენტი კი გამოჯანმრთელდა.

ამ დროისთვის ქვეყანაში კორონავირუსის 15 2704 შემთხვევაა დადასტურებული. გამოჯანმრთელებულთა რაოდენობა 12 6904-ს შეადგენს. გარდაიცვალა 1 425 მოქალაქე.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.