ეკატერინე ტიკარაძე: ექიმების ინფიცირების მაჩვენებელი საქართველოში დღეს არის 6,5%

ექიმების ინფიცირების მაჩვენებელი დღეს საქართველოში არის 6,5%, - ამის შესახებ ეკატერინე ტიკარაძემ მთავრობის ადმინისტრაციაში გამართულ ბრიფინგზე განაცხადა. ჯანდაცვის მინისტრის თქმით, ეს ცუდი მაჩვენებელი არ არის. მან ასევე აღნიშნა, რომ მედპერსონალის გადამზადების ტრენინგები გრძელდება.

„იცით, რომ გვქონდა 11%-ზე მეტი მაჩვენებელი. აქედან გამომდინარე, ეს აღნიშნავს იმას, რომ ჯანდაცვის სამინისტრო რეაგირებს მიმდინარე მოვლენებზე. ექიმების გადამზადების კუთხით, ჩვენ გადავამზადეთ ოჯახის და სოფლის ექიმების 90%, ასევე ზაფხულის პერიოდში გადავამზადეთ 43 კლინიკის ექიმი და აქედან გამომდინარე, ჩვენ ამგვარ ტრენინგებს ვაგრძელებთ. თუმცა, აქაც მნიშვნელოვანია ცოდნის გადაცემა ექიმიდან ექიმზე, ვინაიდან ამ ტრენინგების შინაარსი არც თუ ისეთი რთულია, რომ მათი დაცვა და აღსრულება შემდეგ უკვე მუშაობის პერიოდში იყოს რთული“, - განაცხადა მან.

ამ დროისთვის ქვეყანაში კორონავირუსის 164 976 შემთხვევაა დადასტურებული. გამოჯანმრთელებულთა რაოდენობა 137 499-ს შეადგენს. გარდაიცვალა 1 540 მოქალაქე.

კარანტინის რეჟიმშია 1325 მოქალაქე, სტაციონარში მეთვალყურეობის ქვეშ 6671 პაციენტია. ​კოვიდ-სასტუმროში 4067 ადამიანი იმყოფება.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.