ამირან გამყრელიძე: არ არის საკმარისი 20 ათასი აცრა, დღეს რომ საშუალება იყოს ქვეყანაში 100 ათასი აცრა ვაკეთოთ ყოველდღიურად, სწრაფად შევაჩერებთ ეპიდემიას

ეპიდსიტუაცია სერიოზულად გვაქვს გაუარესებული. რისკები ძალიან მაღალია, - ამის შესახებ ამირან გამყრელიძემ საკოორდინაციო საბჭოს სხდომის შემდეგ განაცხადა. დაავადებათა კონტროლის ეროვნული ცენტრის დირექტორმა მოსახლეობას პირბადის ტარებისა და ვაქცინაციაში უფრო აქტიური ჩართვისკენ მოუწოდა.

„კიდევ ერთხელ ვამბობ, აქედან გამოსავალი დღეს არის ერთი - მკაცრად დავიცვათ ის რეკომენდაციები, რაზეც ხშირად ვსაუბრობთ. მაინც და მაინც ქაღალდზე დაწერილი და ბეჭედდარტყმული უნდა იყოს? ყველამ ვატაროთ პირბადე დახურულ შენობაში, ღია სივრცეში იქ, სადაც 5 ადამიანი ერთად ვიკრიბებით, ყველას გვქონდეს პირბადე. კი ბატონო, ნუ გექნებათ პირბადე, როცა ტყეში სეირნობთ, ლისის ან კუს ტბაზე წრეს აკეთებთ, მაგრამ თუ 5, 7, 8 ადამიანი ერთად სეირნობთ და საუბრობთ, გაიკეთეთ პირბადე! გეუბნებით, რომ ამაზე კარგი დაცვის საშუალება ჯერჯერობით არ არის. და მეორე, გავაინტენსიფიციროთ (აცრები). ხომ ავედით 20 ათასზე? არ არის საკმარისი 20 ათასი. გვინდა 25, კიდევ უკეთესი იქნება დღეში 30 ათასი. დღეს რომ საშუალება იყოს ქვეყანაში 100 ათასი აცრა ვაკეთოთ ყოველდღიურად (ამდენი ვაქცინა არის), სწრაფად შევაჩერებთ ეპიდემიას. გასაგებია, 100 ათასი ძალიან უტოპიური რიცხვია შეიძლება ყველასთვის, მაგრამ შესაძლებელია, რომ ერთი კვირის განმავლობაში 30 ათასზე ავიდეთ და ეს ყველამ ერთად გავაკეთოთ“, - განაცხადა გამყრელიძემ.

ამ დროისთვის საქართველოში კორონავირუსის 436 573 შემთხვევაა დადასტურებული. მათ შორის გამოჯანმრთელდა 393 453, გარდაიცვალა 5 986 პაციენტი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

საქართველოში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. 3 აპრილს ქვეყანამ „სინოფარმის“ ვაქცინის 100 ათასი დოზა მიიღო. ამ ვაქცინის გამოყენება 4 მაისიდან დაიწყო, „სინოვაკით“ იმუნიზაცია კი 24 მაისიდან.