ამირან გამყრელიძე: რომ ვიოცნებოთ და ერთი-ორი კვირის განმავლობაში დღეში ავცრათ ​100 ათასი ადამიანი, ვნახავთ, რომ ერთი კვირის შემდეგ სერიოზულ გარდატეხას შევიტანთ ეპიდემიის განვითარებაში

რომ ვიოცნებოთ და ყველამ ერთად შევძლოთ და ერთი-ორი კვირის განმავლობაში დღეში ავცრათ ​100 ათასი ადამიანი, ვნახავთ, რომ ერთი კვირის შემდეგ სერიოზულ გარდატეხას შევიტანთ ეპიდემიის განვითარებაში, - ამის შესახებ საკოორდინაციო საბჭოს სხდომის შემდეგ გამართულ ბრიფინგზე ამირან გამყრელიძემ განაცხადა. დაავადებათა კონტროლის ცენტრის დირექტორმა აღნიშნა, რომ ამ ეტაპზე ქვეყანას დღეში 28-30 ადამიანის აცრის საშუალება აქვს, გამტარუნარიანობის თვალსაზრისით.

გამყრელიძემ განმარტა, რომ მეორე დოზისთვის შენახული დოზების გარდა, ქვეყანაში პირველი აცრისთვის ვაქცინების საკმარისი რაოდენობაა მობილიზებული.

„150 ათასი „ფაიზერი“ დევს დღეს პირველი დოზისთვის, 130 ათასი „სინოფარმი“ დევს პირველი დოზისთვის, ნახევარი მილიონი „სინოვაკი“ დევს პირველი დოზისთვის, 15 ათასი „ასტრაზენეკა“ დევს პირველი დოზისთვის. ამიტომ ყველას კიდევ ერთხელ მოგიწოდებთ, რომ ვინც არ ბრძანდებით აცრილები, მიბრძანდეთ და აიცრათ, იმიტომ რომ აცრაზე გადის დღეს პანდემიასთან ბრძოლის მთავარი ხაზი“, - განაცხადა გამყრელიძემ.

მისივე თქმით, საკოორდინაციო საბჭო ეპიდვითარებას კიდევ ერთი კვირის განმავლობაში დააკვირდება და საჭიროების შემთხვევაში დამატებით რეგულაციებზე იმსჯელებს.

ამ დროისთვის საქართველოში კორონავირუსის 490 462 შემთხვევაა დადასტურებული. მათ შორის გამოჯანმრთელდა 429 190, გარდაიცვალა 6 483 პაციენტი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

საქართველოში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. 3 აპრილს ქვეყანამ „სინოფარმის“ ვაქცინის 100 ათასი დოზა მიიღო. ამ ვაქცინის გამოყენება 4 მაისიდან დაიწყო, „სინოვაკით“ იმუნიზაცია კი 24 მაისიდან.