ქაქუცა ჩოლოყაშვილის ჩოხა საფრანგეთიდან საქართველოში დააბრუნეს

საბჭოთა ოკუპაციის წინააღმდეგ მებრძოლი ქართველი სამხედრო მოღვაწის ქაიხოსრო (ქაქუცა) ჩოლოყაშვილის ჩოხა საფრანგეთიდან სამშობლოში დააბრუნეს. ინფორმაციას 1tv ავრცელებს. 

საფრანგეთის ქართული სათვისტომოს მმართველმა კომიტეტმა ჩოხა ეროვნულ მუზეუმს საქართველოს დემოკრატიული რესპუბლიკის 100 წლის იუბილესთან დაკავშირებით საჩუქრად გადასცა.

ჩოხა წლების მანძილზე გენერალ გიორგი კვინიტაძის (საქართველოს რესპუბლიკის  საქართველოს შეიარაღებული ძალების შტაბის უფროსი 1918-1921წლებში) შთამომავლებთან ინახებოდა.

„სიტყვებით ვერ გადმოვცემ იმ ემოციას, რასაც დღეს ჩემს მეგობრებთან ერთად საქართველოში ყოფნისას განვიცდი. ძალიან მნიშვნელოვანია ჩვენთვის აქ ყოფნა. განსაკუთრებით იმიტომ, რომ ბაბუაჩემი მონაწილეობდა ამ ბრძოლაში. დიდ პატივს ვცემ იმ ფაქტს, რომ ქართველები თავიანთ ისტორიას ასე აფასებენ და ორმაგად შემიყვარდა საქართველო“, – განაცხადა გენერალ გიორგი კვინიტაძის შვილიშვილმა მერაბ ოდიშელიძემ.

ჩოხა ეროვნული მუზეუმის საკუთრებაში დარჩება და დამთვალიერებელს მისი ნახვა წლის ბოლომდე შეეძლება.

თბილისში, თავისუფლების მოედანზე, პირველი დემოკრატიული რესპუბლიკის დაარსებიდან 100 წლის აღსანიშნავად, სხვადასხვა ღონისძიება იმართება.

ცოტა ხნის წინ თბილისში წვევამდელების ფიცის დადების ცერემონიაც გაიმართა. ცერემონიას უცხოელი სტუმრები,საქართველოს პირველი პირები და მოსახლება ადევნებდა თვალს.

26 მაისს, პირველი რესპუბლიკის 100 წლისთავისადმი მიძღვნილ საზეიმო ღონისძიებები თბილისში გრანდიოზული ფოიერვერკით დასრულდება.