აშშ, რუსეთი და ჩინეთი შეთანხმდნენ რომ ავღანეთიდან უცხო ქვეყნის ჯარები უნდა გავიდნენ

აშშ-მ, რუსეთმა და ჩინეთმა ავღანეთში სამშვიდობო პროცესთან დაკავშირებული მოლაპარაკებების დროს შეთანხმებას მიაღწიეს. 

ავღანეთის სამშვიდობო პროცესის საკითხში ვაშინგტონის სპეციალური წარმომადგენელი ზალმაი ხალილზადი მოსკოვში რუსეთისა და ჩინეთის წარმომადგენლებს შეხვდა. ქვეყნები ავღანეთიდან ჯარების გაყვანის საკითხზე შეთანხმდნენ. ერთობლივი განცხადება სახელმწიფო დეპარტამენტის ვებგვერდზე გამოქვეყნდა.

განცხადებაში აღნიშნულია, რომ უცხოეთის ჯარებმა ავღანეთი უნდა დატოვონ და თავად ავღანელებმა მართონ „ინკლუზიური“ სამშვიდობო პროცესი.

ამავე განცხადების თანახმად, თალიბანი მზადაა, ებრძოლოს ექსტრემისტების გაერთიანება „ისლამურ სახელმწიფოს“ და გაწყვიტოს კავშირი ტერორისტულ დაჯგუფებასთან „ალ-ქაიდა“. 

ასევე, თალიბანი პირობას დებს, რომ მის მიერ კონტროლირებად ტერიტორიას სხვა ქვეყნისათვის საფრთხის შესაქმნელად არ გამოიყენებენ. 

აშშ, რუსეთი და ჩინეთი თალიბანს მოუწოდებენ, დაიწყოს მოლაპარაკება ავღანეთის წარმომადგენლობით დელეგაციასთან, რომელშიც მთავრობაც იქნება წარმოდგენილი.

2019 წლის იანვარში აშშ-სა და „თალიბანის“ მოლაპარაკებაში ჩართულმა მხარეებმა ავღანეთში 17-წლიანი კონფლიქტის დასასრულებლად სამშვიდობო ჩარჩო-შეთანხმებას მიაღწიეს. 

მხარეებს შორის 6-დღიანი მოლაპარაკებები ყატარში გაიმართა. 

პარალელურად ავღანეთის პრეზიდენტმა ისლამურ ფუნდამენტალისტურ პოლიტიკურ-რელიგიურ მოძრაობას პირდაპირი მოლაპარაკებებისკენ მოუწოდა, თუმცა „თალიბანმა“ მთავრობის მოთხოვნა არ გაითვალისწინა.

„თალიბანი“ ავღანეთის ტერიტორიის დიდ ნაწილს 1996-2001 წლებში მართავდა. 

დაჯგუფების მმართველობა ავღანეთში 2001 წლის 11 სექტემბრის ტერაქტის შემდეგ მაშინ დასრულდა, როდესაც აშშ-მა „ალ-ქაიდას“ შემდეგ მთელი ძალისხმევა ავღანეთისკენ მიმართა.