„ნოვიჩოკით“ მოწამლული ბრიტანელი რუსეთის წინააღმდეგ სასამართლო დავას გეგმავს

ბრიტანელი ჩარლი როული, რომელიც ეიმსბერიში ნერვული აგენტი „ნოვიჩოკით“ მოიწამლა, რუსეთის წინააღმდეგ სასამართლო დავას და კომპენსაცის სახით ერთი მილიონი დოლარის მოთხოვნას გეგმავს. ამის შესახებ ინფორმაციას The Daily Mirror-ი ავრცელებს.

ჩარლი როულის თქმით, მომხდარმა მის ცხოვრებაზე მნიშვნელოვანი გავლენა მოახდინა. მისი ადვოკატის, პატრიკ მაგუაირის განცხადებით, როულის სურს გაარკვიოს რა გახდა მოწამვლისა და მისი მეუღლის გარდაცვალების მიზეზი. ადვოკატის თქმით, ის მის დაცვის ქვეშ მყოფის ინტერესების დასაცავად ერთ-ერთ ვარიანტად რუსეთის წინააღმდეგ ჩივილს განიხილავს. 

აპრილში ჩარლი როულიმ განაცხადა, რომ ვლადიმერ პუტინთან შეხვედრა სურს. ეს მან მას შემდეგ განაცხადა, რაც დიდ ბრიტანეთში მდებარე რუსეთის საელჩოში თავისი მეუღლის გარდაცვალების მიზეზების გამოსარკვევად მივიდა. 

რუსეთის „გრუ“-ს ყოფილი თანამშრომელი სერგეი სკრიპალი და მისი ქალიშვილი იულია დიდი ბრიტანეთის ქალაქ სოლსბერიში ნერვული აგენტი „ნოვიჩოკით“ 2018 წლის 4 მარტს მოწამლეს. ამ ფაქტს თანამედროვე პოლიტიკის ისტორიაში ყველაზე დიდი  დიპლომატიური  დაპირისპირება მოჰყვა. ამ ამბიდან ცოტა ხანში საავადმყოფოში „ნოვიჩოკით“ მოწამვლის გამო 2018 წლის 9 ივლისს გარდაიცვალა 44 წლის დაუნ სტარჯესი, ხოლო მისი მეუღლე ჩარლი როული გადარჩა და გონს მოვიდა.

2018 წლის 5 სექტემბერს დიდი ბრიტანეთის პროკურატურამ და სკოტლენდ იარდმა სერგეი სკრიპალისა და მისი შვილის მოწამვლაში ეჭვმიტანილების ვინაობა დაასახელა. დიდი ბრიტანეთის პრემიერის განცხადებით, ისინი რუსეთის სამხედრო დაზვერვაში მუშაობენ.