წითელას გართულების გამო ახალ ზელანდიაში ორ ქალს მუცელი მოეშალა

ახალ ზელანდიაში წითელას დაავადების გართულების შედეგად 5 ორსული საავადმყოფოში გადაიყვანეს, მათგან ორს კი მუცელი მოეშალა. როგორც CNN-ი წერს, ქვეყნის მასშტაბით წითელას ინფექცია ფართოდ არის გავრცელებული.

მედიასაშუალების ინფორმაციით, დედები, რომლებმაც დაავადების გამო ნაყოფი დაკარგეს, ორსულობის მეორე ტრიმესტრში იყვნენ. ქალაქ ოკლენდის რეგიონული საზოგადოებრივი ჯანდაცვის სამსახურის განცხადებით, მუცლის მოშლა არა უშუალოდ წითელას ინფექციასთან, არამედ წითელას გამო ჯანმრთელობის მდგომარეობის გაუარესებასთან არის დაკავშირებული. 

ახალ ზელანდიაში წითელას ინფექცია ოფიციალურად 2017 წელს აღმოიფხვრა, თუმცა ორი წლის შემდეგ ინფექცია ქვეყანაში ისევ დაბრუნდა და ბოლო 20 წლის სტატისტიკის მიხედვით, ყველაზე ფართოდ არის გავრცელებული. 

აგვისტოს ბოლოს ჯანდაცვის მსოფლიო ორგანიზაციამ (WHO) განაცხადა, რომ წითელას ინფექცია ევროპის ისეთ ოთხ ქვეყანაში დაბრუნდა, სადაც ინფექცია უკვე აღმოფხვრილი იყო. ეს ქვეყნებია: ალბანეთი, საბერძნეთი, ჩეხეთი და დიდი ბრიტანეთი.

წითელა გადამდები ინფექცია და პოტენციურად ფატალური დაავადებაა, რომელიც იწვევს ხველას, გამონაყარს და ცხელებას. მისი პრევენცია შესაძლებელია MMR ვაქცინის ორი დოზით, რომელიც დიდ ბრიტანეთში ყველა მცირეწლოვანი ბავშვისთვის უფასოა. 

ქვეყანა ინფექციისგან თავისუფლად მიიჩნევა, თუ 12 თვის განმავლობაში კონკრეტულ გეოგრაფიულ არეალში ინფექციის ენდემური გადაცემა არ ფიქსირდება.

2019 წლის პირველი ექვსი თვის შემდეგ, გასული წლის ანალოგიურ პერიოდთან შედარებით, მსოფლიოში წითელათი დაავადებულთა რაოდენობა სამჯერ გაიზარდა. ამის შესახებ ინფორმაცია ჯანდაცვის მსოფლიო ორგანიზაციის (WHO) ანგარიშში წერია, რომელიც 12 აგვისტოს გამოქვეყნდა.

ორგანიზაციის ექსპერტების ცნობით, წითელას შემთხვევები მსოფლიოში 2016 წლის შემდეგ მზარდია. 2019 წლის პირველ ნახევარში დაინფიცირების მაჩვენებელი ბოლო 13 წლის განმავლობაში ყველაზე მაღალ ნიშნულზე იყო. რისკის ქვეშ მილიონობით ადამიანია, - ამბობენ ჯანდაცვის მსოფლიო ორგანიზაციის ექსპერტები. 

ჯანდაცვის მსოფლიო ორგანიზაციის ცნობით, წითელათი დაავადების ყველაზე მაღალი სტატისტიკა კონგოში, მადაგასკარსა და უკრაინაში დაფიქსირდა. მსხვილი აფეთქებები ასევე იყო აფრიკის ქვეყნებში, ტაილანდში, ფილიპინებზე და ყაზახეთში. 

ევროპის რეგიონში 2019 წლის პირველი ექვსი თვის განმავლობაში წითელას 90 ათასი შემთხვევა გამოვლინდა, მაშინ, როცა მთელი 2018 წლის პერიოდში 84 462 შემთხვევა იყო დაფიქსირებული. სპეციალისტები წითელას შემთხვევების რაოდენობის ზრდას წითელას ვაქცინაციასთან დაკავშირებით მსოფლიოში არსებულ ნეგატიურ განწყობებსაც უკავშირებენ, რადგან ბევრი ადამიანი, როგორც სპეციალისტები ამბობენ, უსაფუძვლოდ თვლის, რომ ვაქცინაცია მათი და მათი შვილების სიცოცხლისთვის უსაფრთხო არ არის. ასევე არსებობს მცდარი მოსაზრება, რომ აუტიზმსა და ვაქცინაციას შორის კავშირი არსებობს, რაც არაერთმა კვლევამ უარყო.