ტრამპი: ერაყში ირანის გავლენის გაძლიერება კარგად არ დასრულდება

აშშ-ის პრეზიდენტი მიიჩნევს, რომ ერაყში ირანის გაძლიერება კარგად არ დასრულდება. ამის შესახებ დონალდ ტრამპმა Twitter-ზე გენერალი ყასემ სულეიმანის მოკვლის შემდეგ დაწერა. 

„მრავალი წლის განმავლობაში აშშ ერაყს წელიწადში მილიარდობით დოლარს უხდიდა. ერაყელებს არ სურთ, რომ მათ ირანი აკონტროლებდეს, თუმცა საბოლოო ჯამში, ეს მათი არჩევანია. ბოლო 15 წლის განმავლობაში ირანი სულ უფრო აკონტროლებს ერაყს და ერაყელები ამით არ არიან ბედნიერები. ეს კარგად არასდროს დასრულდება"- წერს ტრამპი.

TWITTER POST

მანამდე აშშ-მა თავის მოქალაქეებს ერაყის დაუყოვნებლივ დატოვება ურჩია. ირანელი გენერალი ყასემ სულეიმანი და შეიარაღებული დაჯგუფება „ქატაიბ ჰეზბოლას“ ლიდერი აბუ მაჰდი ალ-მუჰანდისი ამერიკელმა სამხედროებმა ბაღდადში მოკლეს. 

პირველ იანვარს აშშ-ის საელჩომ ბაღდადში მოქალაქეებისთვის საკონსულო მომსახურება შეწყვიტა.

31 დეკემბერს ბაღდადში აშშ-ის მიერ ერაყში „ქატაიბ ჰეზბოლას“ ობიექტებზე მიტანილი იერიშის გამო დაწყებული საპროტესტო აქციის მონაწილეებმა აშშ-ის საელჩოზე თავდასხმა განახორციელეს.

მანამდე აშშ-ის ქმედებები ერაყის საგარეო საქმეთა სამინისტრომ დაგმო, ირანმა კი, რომელიც „ქატაიბ ჰეზბოლას“ უჭერს მხარს, თავდასხმას „ტერორიზმის ნათელი მაგალითი“ უწოდა. აშშ-ის საჰაერო ძალებმა სირიასა და ერაყში დაჯგუფება „ქატაიბ ჰეზბოლას“ ობიექტებზე იერიში 29 დეკემბერს მიიტანეს.

ვინ არის ტრამპის ბრძანებით ბაღდადში მოკლული ირანელი გენერალი და დაიწყება თუ არა ომი, შეგიძლიათ ამ ბმულზე წაიკითხოთ.