აშშ-ის ანგარიშვალდებულების სამსახურმა უკრაინისთვის სამხედრო დახმარების შეჩერება კანონდარღვევად აღიარა

უკრაინისთვის სამხედრო დახმარების შეჩერებით თეთრი სახლის საბიუჯეტო სამმართველომ აშშ-ის ფედერალური კანონი დაარღვია. ამის შესახებ BBC აშშ-ის ანგარიშვალდებულების სახელმწიფო სამსახურის (GAO) ანგარიშზე დაყრდნობით წერს. 

„კანონის კეთილსინდისიერი აღსრულება პრეზიდენტს კონგრესის მიერ მიღებული კანონპროექტების საკუთარი პოლიტიკური პრიორიტეტებით ჩანაცვლების უფლებას არ აძლევს“, - ნათქვამია კონგრესის ზეპარტიული უწყების ანგარიშში. თეთრი სახლი ანგარიშს არ ეთანხმება.

2019 წლის სექტემბერში ტრამპმა უკრაინისთვის გამოყოფილი სამხედრო დახმარების შეჩერების ბრძანება გასცა, რადგან უნდოდა დარწმუნებულიყო, რომ სახსრები აშშ-ის ინტერესების თვალსაზრისით მაქსიმალურად ეფექტურად გამოიყენება. 2 ოქტომბერს პრეზიდენტმა კიევს დახმარება განუახლა.

ეს ეპიზოდი ტრამპის იმპიჩმენტის ერთ-ერთი ბრალდების საბაბი გახდა. დემოკრატი კონგრესმენები მიიჩნევენ, რომ დახმარების შეჩერებით ტრამპი უკრაინის პრეზიდენტზე ზეწოლის განხორციელებას ცდილობდა, რათა მას მის კონკურენტ ჯო ბაიდენის ვაჟის მიმართ გამოძიება დაეწყო. კონგრესმენება ეს ძალაუფლების ბოროტად გამოყენებად შეაფასეს. 

დღესვე უკრაინის პოლიციამ აშშ-ის მიერ კიევში ქვეყნის ყოფილ ელჩ მარი იოვანოვიჩზე სავარაუდო თვალთვალის საკითხზე გამოძიება დაიწყო.  ტრამპის ადვოკატის თანაშემწე ლევ პარნასმა კი განაცხადა, რომ პრეზიდენტმა უკრაინაში მისი საქმიანობის შესახებ ყველაფერი იცოდა.

15 იანვარს აშშ-ის კონგრესმა პრეზიდენტის იმპიჩმენტის საკითხში სენატს გადასცა. პროცესზე ბრალდების მხარეს დემოკრატი ადამ შიფი უხელმძღვანელებს. მოსმენები შემდეგ კვირაში დაიწყება. 

აშშ-ის პრეზიდენტის იმპიჩმენტის პროცედურის შესახებ უფრო ვრცლად შეგიძლიათ წაიკითხოთ ამ ბმულზე.