გაეროს სასამართლომ მიანმარში როჰინჯა მუსლიმების გენოციდის პრევენციის ბრძანება გასცა

გაეროს საერთაშორისო სასამართლომ (ICJ) ბრძანება გასცა, რომ მიანმარში როჰინჯა მუსლების გენოციდის შესაჩერებლად ქმედებები გატარდეს. ამის შესახებ ინფორმაციას BBC ავრცელებს. 

სასამართლოში მიანმარის ინტერესებს მისი დე ფაქტო ლიდერი აუნ სან სუ ჩი იცავდა, რომელიც წარდგენილ ბრალდებას არ ეთანხმებოდა და გენოციდი უარყო, თუმცა სასამართლომ მისი განცხადებები არ გაიზიარა. 

სასამართლოში გაეროს გამომძიებლებმა განაცხადეს, რომ მიანმარში გენოციდური ქმედებები შეიძლება განმეორდეს. 17 მოსამართლისგან შემდგარმა კოლეგიამ ერთხმად დაუჭირა მხარი მოწოდებას, რომ მიანმარმა „თავისი ძალის ფარგლებში ყველა ზომა უნდა მიიღოს“ გენოციდის თავიდან ასაცილებლად. 

მიანმარში როჰინჯა მუსლიმების წინააღმდეგ ჩადენილი ქმედებების გამო, სისხლის სამართლის საერთაშორისო სასამართლომ გამოძიება გასული წლის ოქტომბერში დაიწყო. 

მანამდე გაეროს ანგარიშით გაირკვა, რომ გაერთიანება ზოგიერთი მიანმარელი სამხედროს წინააღმდეგ გამოძიების დაწყებას ითხოვდა. ანგარიშში წერია, რომ ისინი, სავარაუდოდ, დამნაშავეები არიან როჰინჯა მუსლიმების წინააღმდეგ ძალადობასა და გენოციდის საქმეზე. 

მიანმარში სიტუაცია 2017 წლის 25 აგვისტოს შემდეგ გამწვავდა. ამ დღეს „როჰინჯა არაკანას გადარჩენის არმიის“ დანებითა და ხელნაკეთი ბომბებით შეიარაღებულმა მებრძოლებმა კოორდინირებული თავდასხმა მოაწყვეს მიანმარის არმიის ბაზასა და პოლიციის 30-ზე მეტ საგუშაგოზე, მოკლეს ქვეყნის სპეცსამსახურების, სულ ცოტა, 12 წარმომადგენელი. დაპირისპირების დაწყებიდან ერთ თვეში, სულ მცირე 6700 როჰინჯა, აქედან 730-ზე მეტი ბავშვი მოკლეს, თუმცა მიანმარის მთავრობა განმარტავს, რომ ისინი როჰინჯა სამხედროებს ებრძვიან და არა მშვიდობიან მოქალაქეებს. 

როჰინჯა - ეთნიკური ჯგუფია, რომელიც მიანმარის შტატ რაკჰაინში ცხოვრობს და ტერიტორიის მკვიდრად მიაჩნია თავი, თუმცა ისტორიკოსების უმეტესობა მიიჩნევს, რომ როჰინჯები ბრიტანული კოლონიალიზმის პერიოდში ბანგლადეშიდან მიანმარში ჩაასახლეს.