New York Times: რუსეთის სამხედრო დაზვერვა „თალიბანთან“ დაკავშირებულ ჯგუფებს საიდუმლოდ სთავაზობდა გასამჯელოს ავღანეთში ამერიკელი სამხედროების ლიკვიდაციისთვის

აშშ-ის დაზვერვის წარმომადგენლებმა დაასკვნეს, რომ აშშ-ის „თალიბანთან“ სამშვიდობო მოლაპარაკებების ფონზე რუსეთის სამხედრო დაზვერვის დანაყოფი „თალიბანთან“ დაკავშირებულ ჯგუფებს საიდუმლოდ სთავაზობდა გასამჯელოს ავღანეთში საერთაშორისო კოალიციის ძალების სამხედროების, მათ შორის ამერიკელი სამხედროების ლიკვიდაციისთვის. ინფორმაციას ამის შესახებ გამოცემა New York Times-ი ინფორმირებულ ოფიციალურ წყაროებზე დაყრდნობით ავრცელებს.

რამდენიმე თვის წინ აშშ-მა დაასკვნა, რომ რუსული დანაყოფი, რომელიც ევროპაში მკვლელობების მცდელობებსა და საიდუმლო ოპერაციების ჩატარებასთან იყო დაკავშირებული, გასულ წელს „თალიბანთან“ დაკავშირებულ ჯგუფებს საიდუმლოდ სთავაზობდა გასამჯელოს ავღანეთში საერთაშორისო კოალიციის ძალებზე თავდასხმისთვის.

აღსანიშნავია, რომ 2019 წელს ავღანეთში 20 ამერიკელი სამხედრო მოკლეს, თუმცა წყაროს ინფორმაციით, გაურკვეველია, თუ რომელი მკვლელობა უკავშირდებოდა რუსეთის დაზვერვის ამ ოპერაციას.

ოფიციალური წყაროების ინფორმაციით, დაზვერვის მონაცემები აშშ-ის პრეზიდენტს, დონალდ ტრამპს შეატყობინეს. მიმდინარე წლის მარტში ეს საკითხი ეროვნული უსაფრთხოების საბჭოზე განიხილეს და რიგი საპასუხო ზომებიც შეამუშავეს, თუმცა საბოლოო საპასუხო ზომა დამტკიცებული არ ყოფილა.

როგორც წყაროები აღნიშნავენ, ამ საკითხზე სადაზვერვო მონაცემები დაკავებული ავღანელი მეომრების დაკითხვებს ეფუძნება. რუსეთის სამხედრო დაზვერვის ამ ოპერაციასთან დაკავშირებით სხვა დეტალები ოფიციალურ წყაროებს არ დაუზუსტებიათ.

ამასთანავე, წყაროები აღნიშნავენ, რომ მიუხედავად იმისა, რომ ამერიკული დაზვერვა დარწმუნებულია იმაში, რომ რუსეთის სამხედრო დაზვერვის წარმომადგენლები ავღანელ მეომრებს ფულს სთავაზობდნენ ამერიკელი სამხედროების ლიკვიდაციისთვის, ამ ეტაპზე ჯერ გაურკვეველია, თუ რუსეთის ხელისუფლების რა დონეზე იყო ეს ოპერაცია სანქცირებული და რა იყო მისი საბოლოო მიზანი.

აშშ-ის მთავრობის შეფასებით, ამ ოპერაციის უკან რუსეთის სამხედრო დაზვერვის დანაყოფი 29155 იდგა, რომელიც 2018 წელს დიდ ბრიტანეთში სკრიპალების მკვლელობის მცდელობის ორგანიზებაში იყო ჩართული.