თეთრი სახლი: რუსეთის უკრაინაში შეჭრის შემთხვევაში, აშშ მზად არის, აღმოსავლეთ ევროპაში სამხედრო წარმომადგენლობის გაძლიერება განიხილოს

რუსეთის უკრაინაში შეჭრის შემთხვევაში, აშშ მზად არის, აღმოსავლეთ ევროპაში სამხედრო წარმომადგენლობის გაძლიერება განიხილოს. ამის შესახებ თეთრი სახლის წარმომადგენელმა განაცხადა.

„თუ პუტინი ნაბიჯს გადადგამს, ჩვენი აღმოსავლეთ ევროპელი მოკავშირეების მხრიდან მეტი ჯარის, შესაძლებლობებისა და წვრთნების მოთხოვნა გაიზრდება და შეერთებული შტატები დადებითად უპასუხებს ამ მოთხოვნას“, - აღნიშნა თეთრი სახლის წარმომადგენელმა.

თეთრ სახლში ასევე აცხადებენ, რომ ჯერ არ იციან, მიიღო თუ არა ვლადიმერ პუტინმა უკრაინაში შემდგომი სამხედრო ესკალაციის გადაწყვეტილება, თუმცა იციან, რომ რუსეთის პრეზიდენტი შესაძლებლობას ამზადებს, რათა აღნიშნულ ესკალაციაზე წავიდეს.

„ჩვენ მივიჩნევთ, რომ შემდგომი მოქმედების შესაძლებლობა გვაქვს, რაც არსებითი ეკონომიკური კონტრზომების მიღებას ითვალისწინებს ევროპელებისა და აშშ-ის მხრიდან. ეს მნიშვნელოვან და სერიოზულ ზიანს მიაყენებს რუსეთის ეკონომიკას“, - აღნიშნეს თეთრ სახლში.

მანამდე ტელეკომპანია CNN-მა ოფიციალურ წყაროებზე დაყრდნობით ინფორმაცია გაავრცელა, რომ რუსეთის უკრაინაში შეჭრისგან შეკავების მიზნით, აშშ-ის ადმინისტრაცია რუსეთის წინააღმდეგ სანქციების ფართო პაკეტის დაწესებას განიხილავს. კერძოდ, სანქციები პუტინის ახლო გარემოცვას, ენერგომწარმოებლებსა და რუსეთის SWIFT-ის სისტემიდან (საერთაშორისო გადახდის სისტემა) გათიშვას შეიძლება შეეხოს.

1-ელ დეკემბერს, ენტონი ბლინკენმა განაცხადა, რომ აშშ შეშფოთებულია მტკიცებულებებით, რომ რუსეთმა უკრაინის წინააღმდეგ მნიშვნელოვანი აგრესიული ქმედებები დაგეგმა. 2 დეკემბერს, აშშ-ის სახელმწიფო მდივანმა თავის რუს კოლეგას განუცხადა, რომ უკრაინაში შეჭრის შემთხვევაში, რუსეთი სერიოზული შედეგების წინაშე დადგება.

უკრაინის თავდაცვის მინისტრის, ალექსეი რეზნიკოვის ინფორმაციით, რუსეთმა უკრაინის საზღვართან 94 000-ზე მეტი ჯარისკაცი განათავსა და იანვრის ბოლოსთვის ფართომასშტაბური სამხედრო შეტევისთვის შეიძლება მოემზადოს.