თეთრი სახლი ირანში მიმდინარე აქციებს ეხმაურება

თეთრი სახლის პრესმდივნის - სარა სანდერსის განცხადებით, ირანში სახალხო აჯანყებაა და საერთაშორისო საზოგადოება გვერდზე ვერ გადგება. 

მისი თქმით, „არაეფექტიანი მმართველობისა და კორუფციის წლებმა გამოიწვიეს ის, რომ ირანელებმა თავიანთი ლიდერებისადმი ნდობა დაკარგეს“.

"ქვეყანაში ფასები იზრდება, ხოლო ისლამური რევოლუციის გუშაგთა კორპუსი მოქალაქეების სახსრებს უცხოური შეიარაღებული დაჯგუფებების მხარდაჭერაზე ხარჯავს. ირანელი ხალხი აღშფოთებულია კორუფციის ზრდით. ისინი დაიღალნენ დაუნდობელი და კორუმპირებული ლიდერებით“, - აღნიშნა სარა სანდერსმა ჟურნალისტებთან შეხვედრაზე.

როგორც თეთრი სახლის პრესმდივანმა განაცხადა, ის, რაც ახლა ირანში ხდება, ნამდვილი სახალხო აჯანყებაა.

„შედეგად, ჩვენ ვხედავთ ნამდვილ სახალხო აჯანყებას, რომლის უკან მამაცი ირანელები დგანან. საერთაშორისო საზოგადოებამ არ უნდა შეინარჩუნოს დუმილი, როგორც ეს ადრე ხდებოდა“, - განაცხადა მან. 

სარა სანდერსმა ასევე აღნიშნა, რომ აშშ-ს პრეზიდენტს, დონალდ ტრამპს ჯერ არ მიუღია გადაწყვეტილება იმის თაობაზე, აღადგინოს თუ არა სასანქციო რეჟიმი ირანის მიმართ.

თეირანში, მეშჰედში, ისპაჰანსა და ირანის სხვა დიდ ქალაქებში მასობრივი აქციები 28 დეკემბრიდან დაიწყო. ქვეყნის პრეზიდენტის, ჰასან როუჰანის თქმით, აქციები შიდა პრობლემებით და გარე ძალების წაქეზებით არის გამოწვეული. ბოლო ინფორმაციით, საპროტესტო აქციების დროს, სულ ცოტა, 20 ადამიანი დაიღუპა.