ტრამპის ყოფილმა მრჩეველმა რობერტ მიულერს ჩვენება მისცა

ამერიკის შეერთებული შტატების პრეზიდენტის დონალდ ტრამპის ყოფილმა მრჩეველმა სპეციალურ  პროკურორ რობერტ მიულერს ჩვენება მისცა. ამის შესახებ BBC წერს.

სტატიის მიხედვით ირკვევა, რომ ტრამპის წინასაარჩევნო კამპანიის ყოფილმა მთავარმა სტრატეგმა სტივ ბენონმა მიულერს ჩვენება გასილ კვირას ორჯერ მისცა. გამომძიებლების შეკითხვებს ის საერთო ჯამში, სულ მცირე 20 საათის განმავლობაში პასუხობდა.

17 იანვარს ამერიკის შეერთებული შტატების პრეზიდენტის, დონალდ ტრამპის ყოფილი თანაშემწე ე.წ. რუსულ საქმეზე სასამართლოში დაიბარეს. ამის მიზეზი ის გახდა, რომ სტივენ ბენონმა კონგრესმენების მიერ დასმულ კითხვებზე პასუხების გაცემაზე უარი თქვა.

კონგრესმენების კითხვები ტრამპის ადმინისტრაციაში მისი მუშაობის პერიოდს ეხებოდა. კერძოდ, კონგრესმენები ითხოვდნენ, რომ ბენონს აშშ-ის არჩევნებში რუსეთის სავარაუდო ჩარევის საქმეზე მოწმის სახით ჩვენება მიეცა. ტრამპის ყოფილი მრჩეველი კი ამტკიცებდა, რომ პრეზიდენტის ადმინისტრაციაში მისი საქმიანობის შესახებ დეტალების გამხელა ეკრძალება.

აშშ-ის პრეზიდენტმა დონალდ ტრამპმა სტრატეგიულ საკითხებში თანაშემწე სტივ ბენონი თანამდებობიდან 2017 წლის აგვისტოში გაათავისუფლა.

დღეს ცნობილი გახდა, რომ ამერიკის შეერთებული შტატების პრეზიდენტის დონალდ ტრამპის ყოფილი მრჩეველი მზადაა გამოძიებასთან ითანამშრომლოს. 

საქმე ეხება რიკ გეითსს, რომელიც გამოცემის ცნობით, უკვე თვეზე მეტია, რაც მოლაპარაკებებს აწარმოებს სპეციალური პროკურორის რობერტ მიულერის გუნდთან. სტატიაში წერია, რომ გეითსის ჩვენება ხელს შეუწყობს პროკურორს პრეზიდენტ ტრამპის და მისი გუნდის საკვანძო წევრების წინააღმდეგ საქმე აღძრას.

10 თებერვალს დონალდ ტრამპმა დემოკრატების მიერ მომზადებული ჩანაწერების გამოქვეყნება დაბლოკა, რომელიც 2016 წლის  საპრეზიდენტო არჩევნებში რუსეთის შესაძლო ჩარევას შეეხება.

აშშ-ის პრეზიდენტის იურისტ-კონსულტანტის განმარტებით, დოკუმენტის გამოქვეყნებამ შესაძლოა გავლენა იქონიოს ეროვნულ უსაფრთხოებაზე, რადგან ის შეიცავს ბევრ საიდუმლო და "განსაკუთრებით მგრძნობიარე" მასალებს. 

2 თებერვალს თეთრმა სახლმა რესპუბლიკელი დევინ ნუნესის ჩანაწერი გამოაქვეყნა, რითაც ტრამპის რუსეთთან კავშირებზე გამოძიების ობიექტურობის ეჭქვეშ დაყენებას შეეცადა. 

25 იანვარს აშშ-ის პრეზიდენტმა დონალდ ტრამპმა ჟურნალისტებს განუცხადა, რომ მზად არის,ამერიკის არჩევნებში რუსეთის ჩარევის გამოძიების ფარგლებში, სპეცპროკურორ რობერტ მიულერს ჩვენება მისცეს. ამასთან, პრეზიდენტის თქმით, ის კონსულტაციას მანამდე ადვოკატებთან გაივლის.

„მე ამისთვის მზად ვარ და მინდა, რომ ეს რაც შეიძლება ჩქარა მოხდეს,“- განაცხადა ტრამპმა.

აშშ რუსეთს საპრეზიდენტო არჩევნების დროს დემოკრატიული პარტიის მონაცემთა ბაზის გატეხასა და ინფორმაციის WikiLeaks-ისთვის გადაცემაში ადანაშაულებს.

აშშ-ის იუსტიციის სამინისტრომ, ამერიკის 2016 წლის არჩევნებში რუსეთის შესაძლო ჩარევის საქმეში სპეციალურ პროკურორად, გამოძიების ფედერალური ბიუროს (FBI) ყოფილი დირექტორი რობერტ მიულერი 2017 წლის 18 მაისს დანიშნა.

გარდა ამისა, აშშ-ის სპეცსამსახურს ჯერ კიდევ 2015 წელს ხელში ჩაუვარდა რუსეთის ოფიციალური პირების ჩანაწერი, რომელშიც დონალდ ტრამპის შესაძლო პრეზიდენტობაზე იყო საუბარი. ამ დროს ტრამპს ოფიციალურად თავისი კანდიდატურა დასახელებული არ ჰქონდა.