ოფიციალური ლონდონი რუსეთში მყოფ საკუთარ მოქალაქეებს რეკომენდაციებს აძლევს

დიდი ბრიტანეთის საგარეო უწყება რუსეთთან პოლიტიკური დაძაბულობის ფონზე საკუთარი მოქალაქეებისთვის რეკომენდაციებს აახლებს, რომელიც რუსეთში მგზავრობისას შესაძლო რისკებს ეხება. რეკომენდაციები დიდი ბრიტანეთის საგარეო უწყების ვებგვერდზეა განთავსებული.

დიდი ბრიტანეთის საგარეო საქმეთა სამინისტრო რუსეთში მყოფ საკუთარ მოქალაქეებს მიმართავს თავი აარიდონ ნებისმიერი პროტესტის ფორმას და არ გამოქვეყნონ საჯარო პუბლკაციები პოლიტიკურ მოვლენებთან დაკავშირებით.

"დიდ ბრიტანეთსა და რუსეთს შორის პოლიტიკური დაძაბულობის გაძლიერების გამო, უნდა იცოდეთ შესაძლო ანტიბრიტანული განწყობის, ან მიმდინარე პერიოდში აგრესიის გამოვლენის შესახებ", - ნათქვამია დიდი ბრიტანეთის საგარეო უწყების მიერ გავრცელებულ ინფორმაციაში.

დღესვე რუსეთის საგარეო უწყება ლონდონის მიმართ ხისტი ზომების მიღებით დაემუქრა. მიზეზი დიდი ბრიტანეთის გადაწყვეტილებაა, რომლის მიხედვითაც ოფიციალური ლონდონი 23 რუს დიპლომატს გააძევებს. 

ორ ქვეყანას შორის ვითარება მას შემდეგ დაიძაბა რაც სერგეი სკრიპალი და მისი შვილი იულია 4 მარტს დიდი ბრიტანეთის ქალაქ სოლსბერის სავაჭრო ცენტრში უგონო მდგომარეობაში იპოვეს და საავადმყოფოში გადაიყვანეს.

პოლკოვნიკი სერგეი სკრიპალი 1999 წლამდე რუსეთის გენერალური შტაბის დაზვერვის მთავარ განყოფილებაში („გრუ") მუშაობდა. 2006 წელს მას ბრიტანეთის დაზვერვის სასარგებლოდ ჯაშუშობისთვის 13 წლით თავისუფლების აღკვეთა მიუსაჯეს. 2010 წელს ის რუსულ, ამერიკულ და ბრიტანულ სპეცსამსახურებს შორის გაცვლის ოპერაციის ფარგლებში შეიწყალეს.

სკრიპალის საქმეს რუსეთის პრეზიდენტი ვლადიმერ პუტინიც გამოეხმაურა და ბრიტანელებს ურჩია ყოფილი ჯაშუშის მოწამვლის ინციდენტში ჯერ თავად გაერკვნენ.

აშშ-ის პრეზიდენტის დონალდ ტრამპის განცხადებით, აქამდე არსებული და ცნობილი ყველა ფაქტი ქმნის საფუძველს, რომ საქმეში რუსეთის ბრალეულობა გამოვლინდეს. ტრამპი გეგმავს, საქმე ბრიტანეთის პრემიერმინისტრთან, ტერეზა მეისთან განიხილოს, რათა სიტუაციაში გაერკვეს. მეიმ ყოფილი რუსი ჯაშუშის მოწამვლაზე პასუხისმგებლობა კრემლს დააკისრა.

13 მარტს, აშშ-ის სახელმწიფო დეპარტამენტმა განცხადება გავრცელა, რომლის შინაარსის თანახმად ვაშინგტონი სერგეი სკრიპალის საქმეზე ბრიტანეთის ვერსიას იზიარებს.

ოფიციალური ლონდონი რუსეთთან ყველა მაღალი დონის შეხვედრას აუქმებს, მათ შორის რუსეთის საგარეო საქმეთა მინისტრის სერგეი ლავროვის ლონდონში ვიზიტს. ასევე, რუსეთში დაგეგმილ ფეხბურთის მსოფლიო ჩემპიონატს არ დაესწრებიან დიდი ბრიტანეთის სამეფო ოჯახის წარმომადგენლები და მთავრობის წევრები.

დიდი ბრიტანეთის საგარეო საქმეთა სამინისტრომ ყოფილი ჯაშუშიშის სერგეი სკრიპალისა და მისი ქალიშვილის მოწამვლის გამო, გაეროს უშიშროების საბჭოს სხდომა მოიწვია.