რომელმა ქვეყნებმა არ გააძევეს რუსი დიპლომატები და რატომ

20-ზე მეტმა ქვეყანამ გააძევა რუსი დიპლომატები დიდ ბრიტანეთში ყოფილი რუსი ჯაშუშის სერგეი სკრიპალის და მისი შვილის იულიას მოწამვლის გამო. BBC-ს რუსულმა სამსახურმა გაარკვია, თუ რომელმა სახელმწიფოებმა (აშშ-ის მოკავშირეებმა და ევროკავშირის წევრებმა) არ გააძევეს თავიანთი ტერიტორიებიდან რუსი დიპლომატები და რით ახსნეს თავისი ნაბიჯი.

ავსტრიამ განაცხადა, რომ ტრადიციულად კარგი ურთიერთობა აქვს რუსეთთან და ამავდროულად მასთან განთავსებულია საერთაშორისო ორგანიზაციების შტაბ-ბინა, სადაც ყოველწლიურად იმართება დიპლომატიური დიალოგი.

საბერძნეთის ხელისუფლებას არ გაუცია ცალსახა პასუხი კითხვაზე, შეუერთდება თუ არა ნატოს და ევროკავშირის პარტნიორების ნაბიჯებს რუსი დილომატების გაძევებასთან დაკავშირებით. ოფიციალურად, ათენი საბოლოო გადაწყვეტილების მისაღებად გამოძიების შედეგებს დაელოდება.    

ბულგარეთმა, რომელიც ივნისის ბოლომდე ევროკავშირის თავმჯდომარე ქვეყანაა, ასევე უარი თქვა რუსი დიპლომატების ქვეყნიდან გაძევებაზე და განაცხადა, რომ კონსულტაციებისთვის მოსკოვიდან თავის ელჩს გამოიძახებს.

ანალოგიურად მოიქცა პორტუგალიაც. ქვეყნის საგარეო საქმეთა მინისტრმა სანტუშ სილვამ განაცხადა, რომ არათანაზომად ესკალაციაში არავინ დაინტერესებული არ არის.

სლოვაკეთის პრეზიდენტის თქმით, ელჩის გამოწვევა სწორი, მაგრამ არასაკმარისი ნაბიჯია. რუსი დიპლომატების გაძევებაზე ამ ქვეყანას გადაწყვეტილება ჯერ არ მიუღია.

სლოვენიის ხელისუფლებამ განაცხადა, რომ გამოძიების შედეგებს დაელოდება.

კვიპროსის მთავრობის წარმომადგენლის თქმით, ქვეყანა არ მიბაძავს ევროკავშირის სხვა ქვეყნებს.

მალტამ და ლუქსემბურგმა მხოლოდ ელჩები გამოიწვიეს მოსკოვიდან კონსულტაციებისათვის.

სერბეთში, რომელიც ევროკავშირის და ნატოს წევრი არ არის, თქვეს, რომ არ აპირებენ დიპლომატების გაძევებას.

თურქეთში, რომელიც ნატოს წევრია, ქვეყნის პრეზიდენტმა განაცხადა, რომ არ აპირებს რუსი დიპლომატების გაძევებას.

ახალმა ზელანდიამ არ გააძევა რუსი დიპლომატები, რადგან რამდენიმე სხვა ქვეყნისაგან განსხვავებით, ახალ ზელანდიაში არ მუშაობენ რუსულ სპეცსამსახურებს ამოფარებული აგენტი დიპლომატები. ამის შესახებ ქვეყნის პრემიერმინისტრმა ჯასინდა არდერნმა განაცხადა. თუმცა ახალმა ზელანდიამ აუკრძალა ქვეყანაში შესხვლა რუსეთის საგარეო საქმეთა სამინისტროს იმ თანამშრომლებს, რომლებიც სკრიპალის საქმის გამო სხვა ქვეყნებიდან გააძევეს.

იმ სახელმწიფოებს შორის, რომლებმაც რუსი დიპლომატები ლონდონის სოლიდარობის ნიშნად სკრიპალის საქმის გამო გააძევეს, საქართველოცაა. თბილისმა, რომელსაც რუსეთთან დიპლომატიური ურთიერთობა არ აქვს, ქვეყნიდან შვეიცარიის საელჩოს რუსეთის ინტერესების სექციის ერთი თანამშრმელი გააძევა.

რუსეთის ყოფილი ჯაშუში სერგეი სკრიპალი და მისი შვილი იულია 4 მარტს, დიდი ბრიტანეთის ქალაქ სოლსბერიში ნერვულ-პარალიტიკური ნივთიერებით მოწამლულნი, უგონო მდგომარეობაში იპოვეს. ლონდონმა მათ მოწამვლაში მოსკოვი დაადანაშაულა. დღეს სკრიპალის და მისი შვილის ჯანმრთელობის მდგომარეობა გაუმჯობესებულია.