ტრამპი სეშნსის გენერალურ პროკურორად დანიშნვას ნანობს

ამერიკის შეერთებული შტატების პრეზიდენტმა დონალდ ტრამპმა განაცხადა, რომ ამერიკის გენერალური პროკურორის თანამდებობაზე ჯეფ სეშნსის ნაცვლად ვინმე სხვა უნდა დაენიშნა. ამის შესახებ ამერიკის ხმა წერს.

თუმცა, ამ განცხადების შემდეგ ტრამპის ადვოკატმა განმარტა, რომ ამ დროისთვის სეშნსის თანამდებობაზე დარჩენას საფრთხე არ ემუქრება.

ტრამპი გენერალურ პროკურორზე თანამდებობაზე დამტკიცებიდან მალევე გაბრაზდა იმის გამო, რომ სეშნსმა რუსეთის მხრიდან ამერიკის არჩევნებში სავარაუდო ჩარევის გამოძიება აირიდა. გამოძიების ერთ-ერთი მიზანი იმის დადგენაცაა, თანამშრომლობდა თუ არა ტრამპის საარჩევნო კამპანია რუსულ მხარესთან.

სეშენსმა საქმის არიდების გადაწყვეტილება იუსტიციის დეპარტამენტის წესებზე დაყრდნობით მიიღო. მას, როგორც ტრამპის კამპანიის მხარდამჭერს და ადამიანს, რომელიც რუსეთის ელჩს წინასაარჩევნო პერიოდში შეხვდა, ინტერესთა კონფლიქტი ჰქონდა, რის გამოც რუსეთის გამოძიების საქმეში ვერ ჩაერთვებოდა.

მანამდე აშშ-ის პრეზიდენტმა დონალდ ტრამპმა აშშ-ის გენერალური პროკურორის მოვალეობის შემსრულებელი სალი იეითსი თანამდებობიდან გაათავისუფლა, იმიგრაციის შესახებ განკარგულების შესრულებაზე უარის თქმის გამო.

ასევე CNN-ის მტკიცებით, რუსეთის ელჩი ამერიკაში სერგეი კისლიაკი რუსეთის ჯაშუშია.  

ტელეკომპანიამ განცხადება იმ ფონზე გააკეთა, როდესაც ცოტა ხნის New York Times-მა გენერალური პროკურორის ჯეფ სეშნსის და რუსეთის ელჩ სერგეი კისლიაკს შორის გამართული საუბრების შესახებ სტატია გამოაქვეყნა.

Washington Post-ი იუსტიციის სამინისტროს წყაროზე დაყრდნობით წერს, რომ აშშ-ის კონგრესში, სეშნსის კანდიდატურის განხილვისას, მას ჰკითხეს, ჰქონდა თუ არა კონტაქტი რუსეთის წარმომადგენლებთან, რაზეც მან უარყოფითად უპასუხა და კონგრესს დაუმალა კისლიაკთან კავშირის შესახებ. 

თუმცა, ტრამპმა გენპროკურორი რუსეთთან საეჭვო კავშირების ბრალდებისგან დაიცვა.

2016 წლის დეკემბერში, აშშ-ის სპეცსამსახურებმა მოამზადეს სპეციალური ანგარიში ამერიკულ არჩევნებში რუსეთის ჩარევის შესახებ. რის შემდეგაც, კონგრესის სამმა კომიტეტმა და სპეციალურმა პროკურორმა, FBI-ის ყოფილმა დირექტორმა რობერტ მიულერმა საქმის გამოძიება დაიწყეს.

გამოძიების ფარგლებში ამოწმებენ ინფორმაციას დონალდ ტრამპის და მისი გარემოცვის რუსეთის ხელისუფლებასთან კავშირებზე. ამ საქმის ფიგურანტები არიან ტრამპის წინასაარჩევნო შტაბის ყოფილი უფროსი პოლ მანაფორტი და ტრამპის ყოფილი მრჩეველი მაიკლ ფლინი. პრეზიდენტის წინააღმდეგ მტკიცებულებების აღმოჩენის შემთხვევაში ეს შეიძლება მისი იმპიჩმენტის საფუძველი გახდეს.

თუმცა, სპეციალური პროკურორის რობერტ მიულერის გუნდმა, რომელიც იძიებს რუსეთის სავარაუდო ჩარევას ამერიკის შეერთებული შტატების საპრეზიდენტო არჩევნებში, დონალდ ტრამპის ადვოკატებს აცნობა, რომ მიულერს არ შეუძლია მოქმედ პრეზიდენტს ბრალი წაუყენოს.