Facebook-მა ჩინური კომპანიებისთვის მონაცემების გაზიარება აღიარა

Facebook-მა აღიარა, რომ ოთხ ჩინურ ტექნოლოგიურ კომპანიასთან მონაცემთა ბაზის გაზიარების ხელშეკრულება ჰქონდა, რომელთაგან ერთს, ამერიკის სადაზვერვო სამსახურები, ეროვნული უსაფრთხოებისთვის საფრთხედ მიიჩნევენ. ამის შესახებ ამერიკის ხმა წერს.

ეს ფაქტი, სოციალური ქსელების გიგანტის მიერ, მომხმარებელთა პირადი ინფორმაციის გამოყენების მიმართ ახალ კითხვებს აჩენს.

Facebook-ის აღიარება, გაზეთ „ნიუ იორკ თაიმსის“ მიერ იმ ფაქტის გამჟღავნებიდან ორი დღის შემდეგ მოხდა, რომლითაც ცნობილი გახდა, რომ კომპანიამ მონაცემთა ბაზის გაზიარების შესახებ შეთანხმება ელექტრონული მოწყობილობების 60 მწარმოებელთან დადო. მათ შორის არიან, „ჰუავეი“, „ლენოვო“, „ოპპო“ და „თი სი ელი“.

ამერიკის შეერთებული შტატების სადაზვერვო სამსახურების ხელმძღვანელები „ჰუავეის“ გარშემო უკვე წლებია გამოთქვამენ შეშფოთებას, რადგან შიშობენ, რომ ჩინეთის მთავრობას შეეძლო ამ მოწყობილობებზე და სერვერებზე არსებულ ინფორმაციაზე წვდომა მოეთხოვა. ამის გამო, შეერთებული შტატების სამხედრო უწყებამ, თავის ბაზებზე „ჰუავეის“ სმარტფონების გაყიდვა აკრძალა.

მანამდე Cambridge Analytica-ს სკანდალის შემდეგ Facebook-ს უსაფრთხოების ნორმებთან დაკავშირებული ზომების მიღება მოუწია. ამის გამო მარკ ცუკერბერგი არაერთგზის გააკრიტიკეს. კომპანიამ 180 მილიონი ყალბი ანგარიშიც გააუქმა. 

შეიცვალა და გამკაცრდა Facebook-ში პოლიტიკური რეკლამების განთავსებაც. რამდენიმე დღის წინ ცნობილია გახდა, რომ Facebook-მა ამერიკის შეერთებული შტატების პოლიტიკური რეკლამების არქივი შექმნა.

Cambridge Analytica Facebook-ის მილიონობით მომხმარებლის პერსონალური ინფორმაციის გამოყენებაში დაადანაშაულეს. კომპანიამ პერსონალური მონაცემები 2016 წლის აშშ-ის საპრეზიდენტო კამპანიისთვის გამოიყენა, რათა ეფექტიანი პოლიტიკური რეკლამა შეექმნა. 

18 მარტს მასაჩუსეტსის შტატის გენერალურმა პროკურორმა მარა ჰელეიმ Facebook-ისა და კომპანია Cambridge Analytica-ს წინააღმდეგ გამოძიება დაიწყო.