პოლიციამ ათენში დემონსტრანტები ცრემლმდენი გაზით დაშალა

საბერძნეთის პოლიციამ ცრემლმდენი გაზის გამოყენებით დაშალა ანტისამთავრობო აქცია ათენში, პარლამენტის წინ, სადაც კანონმდებლები მსჯელობენ მთავრობისადმი ნდობის საკითხის კენჭისყრის დაყენებაზე მაკედონიასთან მისი სახელწოდების თაობაზე მიღწეული შეთანხმების გამო. ინფორმაციას რადიო თავისუფლება ავრცელებს.

მრავალწლიანი დაპირისპირების შემდეგ, ათენმა და სკოპიემ მიაღწიეს შეთანხმებას, რომლის თანახმად მაკედონიას ამიერიდან ეწოდება „ჩრდილოეთ მაკედონიის რესპუბლიკა“. საბერძნეთის ოპოზიციური პარტიები და მოსახლეობის ნაწილი ამ ნაბიჯს „კაპიტულანტურს“ უწოდებს და წინააღმდეგია იმისა, რომ სახელწოდება „მაკედონია“ ფიგურირებდეს იუგოსლავიის ყოფილი რესპუბლიკის დასახელებაში.

მაკედონიის პრეზიდენტმა გეორგე ივანოვმა თავის მხრივ პირობა დადო, რომ გამოიყენებს ვეტოს უფლებას, თუ მაკედონიის პარლამენტი მხარს დაუჭერს საბერძნეთთან მიღწეულ შეთანხმებას. საბერძნეთის პრემიერმინისტრ ალექსის ციპრასი დარწმუნებულია, რომ ოპოზიცია ვერ შეძლებს უნდობლობის გამოცხადებისათვის საკმარისი ხმების მობილიზებას.

მაკედონიის სახელწოდების შესახებ კამათი 1991 წელს იუგოსლავიიდან დამოუკიდებლობის მოპოვების შემდეგ დაიწყო. ახლა, როცა მაკედონია ნატოსა და ევროკავშირში გაწევრიანებას აპირებს, მისი სახელწოდება კიდევ უფრო აქტუალური გახდა. საბერძნეთის ხელისუფლება შიშობს, რომ ამ სახელწოდებამ შესაძლოა ჩრდილოეთ საბერძნეთის პროვინცია მაკედონიასთან დაკავშირებით სირთულეები შექმნას.