საბერძნეთის პრემიერმინისტრი უნდობლობის გამოცხადებას გადაურჩა

საბერძნეთის პრემიერმინისტრი ალექსის ციპრასი გადაურჩა უნდობლობის გამოცხადებას საკანონმდებლო ორგანოს მიერ, რასაც მმართველი პარტიის ოპონენტები ცდილობდნენ მაკედონიის სახელწოდებასთან დაკავშირებით, ათენსა და სკოპიეს შორის მიღწეული კომპრომისული შეთანხმების შემდეგ დაწყებული უკმაყოფილების ფონზე. ამის შესახებ financialexpress-ი წერს.

პარლამენტის სხდომის პარალელურად, შენობის წინ, ათენში მიმდინარეობდა მრავალათასიანი ანტისამათავრობო აქცია, რომელიც პოლიციამ ცრემლმდენი გაზისა და კვამლის ყუმბარების გამოყენებით დაშალა.

ციპრასის მხარდამჭერმა კანონმდებლებმა არ მიიღეს ოპოზიციური ახალი დემოკრატიული პარტიის წინადადება უნდობლობის გამოცხადების თაობაზე. სამასი დეპუტატიდან მთავრობის გადადგომას მხარი დაუჭირა 127-მა, წინააღმდეგ ხმა მისცა 153-მა.

ოპოზიცია ადანაშაულებს ალექსის ციპრასს, მათი აზრით, მაკედონიის სახელწოდების საკითხში ძალიან ბევრი დათმობის გამო. მოელიან, რომ ხელშეკრულებას ხელი ხვალ მოეწერება. მრავალწლიანი დაპირისპირების შემდეგ, გასულ კვირაში, ათენმა და სკოპიემ მიაღწიეს შეთანხმებას, რომლის თანახმად მაკედონიას ამიერიდან ეწოდება „ჩრდილოეთ მაკედონიის რესპუბლიკა“.

საბერძნეთის ოპოზიციური პარტიები და მოსახლეობის ნაწილი ამ ნაბიჯს „კაპიტულანტურს“ უწოდებს და წინააღმდეგია იმისა, რომ სახელწოდება „მაკედონია“ ფიგურირებდეს იუგოსლავიის ყოფილი რესპუბლიკის დასახელებაში.

მაკედონიის პრეზიდენტმა გეორგე ივანოვმა თავის მხრივ პირობა დადო, რომ გამოიყენებს ვეტოს უფლებას, თუ მაკედონიის პარლამენტი მხარს დაუჭერს საბერძნეთთან მიღწეულ შეთანხმებას. საბერძნეთის პრემიერმინისტრ ალექსის ციპრასი დარწმუნებულია, რომ ოპოზიცია ვერ შეძლებს უნდობლობის გამოცხადებისათვის საკმარისი ხმების მობილიზებას.

მაკედონიის სახელწოდების შესახებ კამათი 1991 წელს იუგოსლავიიდან დამოუკიდებლობის მოპოვების შემდეგ დაიწყო. ახლა, როცა მაკედონია ნატოსა და ევროკავშირში გაწევრიანებას აპირებს, მისი სახელწოდება კიდევ უფრო აქტუალური გახდა. საბერძნეთის ხელისუფლება შიშობს, რომ ამ სახელწოდებამ შესაძლოა ჩრდილოეთ საბერძნეთის პროვინცია მაკედონიასთან დაკავშირებით სირთულეები შექმნას.