ირანიდან მოპარული ბირთვული დოკუმენტების ნაწილი გასაჯაროვდა

ისრაელმა გაასაჯაროვა ირანის ბირთვული დოკუმენტების ახალი დეტალები, თუმცა მასალით არ დასტურდება, რომ ირანი 2015 წლის ბირთვული შეთანხმებით ნაკისრ ვალდებულებებს არღვევდა. მასალა ირანიდან მალულად ისრაელის სპეცსამსახურმა "მოსადმა" გამოიტანა, რისთვისაც მოსადის აგენტებს 6 საათი და 29 წუთი დასჭირდათ. თუმცა სპეცოპერაცია მანამდე რამდენიმე თვის განმავლობაში მიმდინარეობდა. ამის შესახებ "რადიო თავისუფლება" New York Times-ზე დაყრდნობით წერს.

აპრილში ისრაელის პრემიერმინისტრმა ბენიამინ ნეთანიაჰუმ განაცხადა, რომ ისრაელის დაზვერვამ 55-ათას გვერდიანი მასალა და 183 კომპაქტური დისკი მოიპოვა, რომელიც 2003 წლიდან ირანის ბირთვულ პროგრამაზე მუშაობის შესახებ ინფორმაციას მოიცავდა. თუმცა როგორც New York Times-სი ექსპერტებზე დაყრდნობით წერს, მასალებით არ დასტურდება ირანის მიერ ბირთვული შეთანხმების დარღვევა.

8 მაისს ტრამპმა განაცხადა, რომ 2015 წლის ირანის ბირთვულ შეთანხმებას ტოვებდა, რითაც ახლო აღმოსავლეთში კონფლიქტის რისკი გაზარდა და ევროპელი მეგობრები გაანაწყენა. 

9 მაისს ცნობილი გახდა, რომ ოფიციალური ვაშინგტონი ირანის წინააღმდეგ სანქციებს 180 დღეში აღადგენდა და ის შეზღუდვები რაც ამ ქვეყნის წინააღმდეგ ბირთვული შეთანხმების ფარგლებში იყო დაწესებული კვლავ განახლდებოდა. 24 მაისს კი ცნობილი გახდა, რომ აშშ-მა ირანში არსებულ ცხრა ინდივიდსა და ორგანიზაციას სანქციები დაუწესა. 

14 ივნისს ირანმა აშშ-ის შეთანხმებიდან გასვლის გამო კომპენსაცია მოითხოვა. 

2015 წელს აშშ-მა, საფრანგეთმა, გერმანიამ, დიდმა ბრიტანეთმა, ჩინეთმა და რუსეთმა ირანთან მიღწიეს შეთანხმებას, რომელიც ითვალისწინებს თეირანის მიერ ბირთვულ პროგრამაზე უარის სანაცვლოდ საერთაშორისო სანქციების, მათ შორის ირანის მიერ ნავთობით ვაჭრობის აკრძალვის გაუქმებას.