ევროკავშირი ირლანდიის საზღვრის შესახებ ბრიტანეთთან დათმობაზე წასასვლელად მზად არის

"ევროკავშირი მზად არის გააუმჯობესოს Brexit-ის გამო ირლანდიის საზღვრის კონტროლთან დაკავშირებული შეთავაზება", - ამის შესახებ ევროკავშირის მხრიდან დიდ ბრიტანეთთან მთავარმა მომლაპარაკებელმა მიშელ ბარნიემ განაცხადა. ინფორმაციას BBC ავრცელებს.

ორივეს, დიდ ბრიტანეთსაც და ევროკავშირსაც Brexit-ის შემდეგ მკაცრი სასაზღვრო კონტროლის თავიდან არიდება სურს, რაც გულისხმობს სათვალთვალო კამერებსა და საბაჟო პოსტებზე უარის თქმას. ამ სურვილის მიუხედავად, ისინი ჯერ ვერ შეთანხმდნენ, რა სახით გააკონტროლონ ირლანდიასთან გამავალი საზღვარი. 

როგორც BBC წერს, ევროპელი მომლაპარაკებლის ტონი შერბილდა და ბარნიე მზად არის ბრიტანეთს ახალი შეთავაზება გაუკეთოს. 

Brexit-ის შემდეგ ევროკავშირს და დიდ ბრიტანეთს შორის ერთადერთი სახმელეთო საზღვარი ირლანდიასა და ჩრდილოეთ ირლანდიას შორის გავა. ამ ტერიტორიას ყოველდღიურად ათასობით ადამიანი კვეთს სხვადასხვა მიზნით: მიდიან სამსახურებში, გასართობად, პროდუქტისა თუ მედიკამენტების საყიდლად. Brexit-ის შემდეგ სასაზღვრო ხაზის გავლებისა და მკაცრი საბაჟო კონტროლის შემთხვევაში კი მოქალაქეების მდგომარეობა გადაადგილების კუთხით გართულდება. 

6 ივლისს ბრიტანეთის მთავრობამ განაცხადა, რომ ქვეყნის ევროკავშირიდან გასვლის პირობებზე ერთიანი პოზიცია შეიმუშავა. განცხადება 12-საათიანი შეხვედრის შედეგი იყო, წარმოდგენილი პოზიცია კი შეფასდა, როგორც Brexit-ის „რბილი“ ვერსია, რომლის ერთ-ერთი მთავარი პუნქტიც ირლანდიის საზღვრის პრობლემის გადაწყვეტაა. მთავრობის აზრით, ამ პუნქტების პრაქტიკაში რეალიზების შემთხვევაში წარმატებით გადაწყდება „ბრექსიტზე“ მოლაპარაკებების ერთ-ერთი ყველაზე რთული პუნქტი. თავისუფალი ვაჭრობის ზონიდან გასვლას დასჭირდებოდა სასაზღვრო შენობების აგება ევროკავშირს და დიდ ბრიტანეთს შორის არსებულ ერთადერთ სახმელეთო საზღვარზე - ირლანდიას და ჩრდილოეთ ირლანდიას შორის. ამის თავიდან ასაცილებლად ევროკავშირი ლონდონს ფაქტობრივად სთავაზობდა „ბრექსიტის“ გაყინვას. მთავრობა ამბობს, რომ მათ მიერ შეთავაზებული ვარიანტის თანახმად, ეს სირთულეები მოიხსნება.

ლონდონსა და ბრიუსელს შორის Brexit-ის პირობების შესახებ ოფიციალური მოლაპარაკებები გასული წლის 19 ივნისს დაიწყო. დიდი ბრიტანეთის პრემიერმინისტრმა, ტერეზა მეიმ ქვეყნის ევროკავშირიდან გასვლის პროცედურის შესახებ დოკუმენტს ხელი 29 მარტს მოაწერა.

გარდამავალი პერიოდი 2019 წლის 29 მარტს დაიწყება. სწორედ ამ დღეს დატოვებს დიდი ბრიტანეთი ევროკავშირს ოფიციალურად.