გერმანიის კათოლიკურმა ეკლესიამ პედოფილიის მსხვერპლებს ბოდიში მოუხადა

გერმანიის კათოლიკური ეკლესიის კარდინალმა რეინჰარდ მარქსმა სასულიერო პირების მხრიდან სექსუალური ძალადობის მსხვერპლებს ბოდიში მოუხადა. 

Euronews-ის ცნობით, კარდინალმა მსგავს ფაქტებს დანაშაული უწოდა. მისივე თქმით, ამ დანაშაულის ჩამდენი პირები უნდა დაისაჯონ.

მარქსმა ეს განცხადება გერმანიის საეპისკოპოსო კონფერენციაზე განაცხადა. შეხვედრის მონაწილეებმა 350-გვერდიანი ანგარიში უნდა განიხილონ, რომელიც ეკლესიამ 4 წლის წინ შეუკვეთა.

სექტემმბრის დასაწყისში ცნობილი გახდა, რომ გერმანიაში კათოლიკური ეკლესიის სასულიერო პირებმა 70 წლის განმავლობაში 3600 ბავშვზე სექსუალურად იძალადეს.

ლაპარაკია 1946-2014 წლებზე. კვლევა გერმანულმა უნივერსიტეტებმა ჩაატარეს. მსხვერპლთა ნახევარზე მეტი ბიჭია, ხოლო მათი ასაკი ხშირ შემთხვევაში 13 წელს არ აღემატება. ამავე კვლევის მიხედვით, სექსუალურ ძალადობაში ბრალდებულია 1670 სასულიერო პირი.

12 სექტემბერს რომის პაპმა ეკლესიაში სექსუალური ძალადობის თემაზე უპრეცედენტო კონფერენცია ჩაატარა.

ბოლო პერიოდის განმავლობაში რომის პაპს აკრიტიკებდნენ, რათა მან არ უპასუხა არქიეპისკოპოს კარლო მარია ვიგანოს ბრალდებებს. არქიეპისკოპოსმა წერილი გამოაქვეყნა, რომელშიც წერს, რომ რომის პაპი სასულიერო პირების მხრიდან ბავშვებზე სექსუალური ძალადობის შესახებ საქმის კურსში ჯერ კიდევ 5 წლის წინ ჩააყენა. თუმცა, მისი მტკიცებით, ფრანცისკემ მაშინ არაფერი მოიმოქმედა. კერძოდ ლაპარაკია თეოდორ მაკარიკზე. მხოლოდ ივლისის ბოლოს ჩამოართვა რომის პაპმა ფრანცისკემ ამერიკელ კარდინალ თეოდორ მაკარიკს საეკლესიო წოდება.

15 აგვისტოს პენსილვანიის უზენაესმა სასამართლომ ნაფიც-მსაჯულთა ანგარიში გამოაქვეყნა, რომელშიც კათოლიკური ეკლესიის 300-მდე საეკლესიო პირი სექსუალურ ძალადობაში დამნაშავედ ცნო. დოკუმენტი ბოლო 70 წლის მოვლენებს ასახავს. ამ ხნის განმავლობაში სექსუალური ძალადობის მსხვერპლი 1000-ზე მეტი ბავშვი გახდა.

ამის შემდეგ ვატიკანმა გამოაქვეყნა განცხადება, რომელშიც წერდა, რომ პაპი ფრანცისკე მსხვერპლთა გვერდით დგას და ის პედოფილ საეკლესიო მსახურებს მტაცებლებად მიიჩნევს.