ტრამპი გაეროს უშიშროების საბჭოს ირანის იზოლირების გეგმას წარუდგენს

აშშ-ის პრეზიდენტი, დონალდ ტრამპი გაეროს უშიშროების საბჭოს წარუდგენს გეგმას ირანის იზოლირების თაობაზე, ერთ დღეში მას შემდეგ, რაც მან გაეროს გენერალურ ასამბლეაზე ყველა ქვეყანას მოუწოდა თეირანის იზოლაციისკენ.  ინფორმაციას "რადიო თავისუფლება" ავრცელებს. 

თუმცა, იმ პირობებში, როცა 15-წევრიან საბჭოში ირანის წამყვანი მოკავშირეები, რუსეთი და ჩინეთი არიან, და ასევე იმ გარემოების გათვალისწინებით, რომ ვაშინგტონის ევროპელი მოკავშირეები არ ეთანხმებიან ტრამპის გადაწყვეტილებას გამოსულიყო ირანთან 2015 წელს მიღწეული ბირთვული შეთანხმებიდან, ეს შეხვედრა დიდი ალბათობით მხოლოდ ირანთან მიმართებით არსებულ უთანხმოებას წარმოაჩენს მსოფლიოს წამყვან ქვეყნებს შორის.

გენერალურ ასამბლეაზე გამოსვლისას, ტრამპმა მძაფრად გააკრიტიკა ირანის ლიდერები, მათ ბრალი დასდო "ქაოსის, სიკვდილის და ნგრევის" გავრცელებაში ახლო აღმოსავლეთში და მსოფლიოს ქვეყნების მთავრობებს მოუწოდა მას შეუერთდნენ თეირანის იზოლირების საქმეში.

თეთრი სახლის ლიდერმა ასევე განაცხადა, რომ აშშ გახდა უფრო ძლიერი, მდიდარი და უსაფრთხო. მისი თქმით, მისმა ადმინისტრაციამ ისეთ შთამბეჭდავ შედეგებს მიაღწია, როგორი შედეგებისთვისაც არ მიუღწევია აშშ-ის ისტორიაში არცერთ სხვა ადმინისტრაციას. ამ სიტყვებს დარბაზიდან სიცილი მოჰყვა, რამაც პრეზიდენტი არ დააბნია, პირიქით მან პასუხად გაიცინა და თქვა „ასეთ რეაქციას არ ველოდი“.

რამდენიმე საათში ტრამპს გამოეხმაურა ირანის პრეზიდენტი, ჰასან როუჰანი. მან დაგმო, მისი თქმით, საერთაშორისო ხელშეკრულებების უგულებელყოფის ვაშინგტონის პოლიტიკა და ძალის პოლიტიკის გატარება მსოფლიოს გარშემო. როუჰანიმ უშიშროების საბჭოს დაგეგმილი შეხვედრაც გააკრიტიკა და მას უწოდა "უგუნური და არანორმალური აქტი."

ორ ქვეყანას შორის ურთიერთობა მას შემდეგ დაიძაბა, რაც 8 მაისს დონალდ ტრამპმა განაცხადა, რომ აშშ ირანის ბირთვული პროგრამის შეთანხმებიდან გადის. ამერიკის პრეზიდენტის თქმით, გარიგების გაფორმების დღიდან ირანმა თავისი სამხედრო ბიუჯეტი 40%-ით გაზარდა, დაიწყო ბირთვულქობინებიანი ბალისტიკური რაკეტების შექმნა, ხოლო უცხოეთში აქტივებზე სანქციების მოხსნის შემდეგ რესურსები ტერორიზმის დაფინანსებისათვის გამოიყენა. ასევე ტრამპმა მხარი დაუჭირა ისრაელის პოზიციას იმის შესახებ, თითქოს შეთანხმების გაფორმების მომენტისთვის ირანმა დამალა, რომ ბირთვულ იარაღზე მუშაობდა.