ტრამპის გეგმას ირანის იზოლაციის შესახებ გაეროს უშიშროების საბჭოს წევრებმა მხარი არ დაუჭირეს

აშშ-ის პრეზიდეტმა დონალდ ტრამპმა, გაეროს უშიშროების საბჭოს სხდომაზე თავისი თავმჯდომარეობისას, მსოფლიოს ირანის მთავრობის იზოლირებისკენ მოუწოდა. სხდომა ეძღვნებოდა მასობრივი განადგურების იარაღის გაუვრცელებლობის თემას.  ინფორმაციას "რადიო თავისუფლება" ავრცელებს. 

ტრამპის მოწოდებას სხვა ქვეყნებისადმი, შეერთდებოდნენ აშშ-ის სანქციებს ირანის წინააღმდეგ, ევროპულმა სახელმწიფოებმა მხარი არ დაუჭირეს. 

ირანის პრეზიდენტმა, ჰასან როუჰანიმ გაეროს შეხვედრების კულუარებში ჟურნალისტებს უთხრა, რომ თეირანი გააგრძელებს ბირთვული შეთანხმებით ნაკისრი ვალდებულებების შესრულებას, სანამ პირობები ირანისთვის სასარგებლო იქნება. ვაშინგტონის ევროპელი პარტნიორების რეაქციამ ხაზი გაუსვა მათ უთანხმოებას ტრამპის გადაწყვეტილებისადმი, გამოსულიყო ბირთვული შეთანხმებიდან.

გენერალურ ასამბლეაზე გამოსვლისას, ტრამპმა მძაფრად გააკრიტიკა ირანის ლიდერები, მათ ბრალი დასდო "ქაოსის, სიკვდილის და ნგრევის" გავრცელებაში ახლო აღმოსავლეთში და მსოფლიოს ქვეყნების მთავრობებს მოუწოდა მას შეუერთდნენ თეირანის იზოლირების საქმეში.

თეთრი სახლის ლიდერმა ასევე განაცხადა, რომ აშშ გახდა უფრო ძლიერი, მდიდარი და უსაფრთხო. მისი თქმით, მისმა ადმინისტრაციამ ისეთ შთამბეჭდავ შედეგებს მიაღწია, როგორი შედეგებისთვისაც არ მიუღწევია აშშ-ის ისტორიაში არცერთ სხვა ადმინისტრაციას. ამ სიტყვებს დარბაზიდან სიცილი მოჰყვა, რამაც პრეზიდენტი არ დააბნია, პირიქით, მან პასუხად გაიცინა და თქვა „ასეთ რეაქციას არ ველოდი“.

ორ ქვეყანას შორის ურთიერთობა მას შემდეგ დაიძაბა, რაც 8 მაისს დონალდ ტრამპმა განაცხადა, რომ აშშ ირანის ბირთვული პროგრამის შეთანხმებიდან გადის. ამერიკის პრეზიდენტის თქმით, გარიგების გაფორმების დღიდან ირანმა თავისი სამხედრო ბიუჯეტი 40%-ით გაზარდა, დაიწყო ბირთვულქობინებიანი ბალისტიკური რაკეტების შექმნა, ხოლო უცხოეთში აქტივებზე სანქციების მოხსნის შემდეგ რესურსები ტერორიზმის დაფინანსებისათვის გამოიყენა. ასევე ტრამპმა მხარი დაუჭირა ისრაელის პოზიციას იმის შესახებ, თითქოს შეთანხმების გაფორმების მომენტისთვის ირანმა დამალა, რომ ბირთვულ იარაღზე მუშაობდა.