ბენიამინ ნეთანიაჰუ: ირანს საიდუმლო ბირთვული ობიექტი აქვს

გაეროს გენერალურ ასამბლეაზე სიტყვით გამოსვლისას ბენიამინ ნეთანიაჰუმ განაცხადა, რომ „ირანი ბირთვულ იარაღს ვერ შექმნის, რადგან რასაც თაირანი დამალავს, ისრაელი იპოვის“. ამის შესახებ The Times of Israel-ი წერს. 

73-ე სესიაზე საუბრისას ისრაელის პრემიერმინისტრმა მტკიცებულები წარადგინა და განმარტა, რომ მისი ინფორმაციით, ირანი მეორე საიდუმლო ბირთვულ ობიექტს მალავს, რომელიც თეირანშია განთავსებული. ნეთანიაჰუს თქმით, ატომური სააგენტო აქამდე ამ საკითხით არ დაინტერესებულა და სწორედ ამიტომ გადაწყვიტა ინფორმაციის გასაჯაროება. 

ისრაელის პრემიერმინისტრის თქმით, ირანმა ხელშეკრულების შემდეგ მიღებული თანხა შიდა პრობლემების მოსაგვარებლად, კონკრეტულად კი შეარაღებისთვის გამოიყენა. მისი თქმით, ირანის ბირთვულმა შეთანხმებამ ისრაელი არაბულ ქვეყნებთან უფრო მეტად დაახლოვა. 

მანამდე ტრამპმა მხარი დაუჭირა ისრაელის პოზიციას იმის შესახებ, თითქოს შეთანხმების გაფორმების მომენტისთვის ირანმა დამალა, რომ ბირთვულ იარაღზე მუშაობდა.

ამ თემაზე დონალდ ტრამპმა გაეროს უშიშროების საბჭოს სხდომაზეც ისაუბრა და მსოფლიოს ირანის მთავრობის იზოლირებისკენ მოუწოდა.

8 მაისს დონალდ ტრამპმა განაცხადა, რომ აშშ ირანის ბირთვული პროგრამის შეთანხმებიდან გადის. ამერიკის პრეზიდენტის თქმით, გარიგების გაფორმების დღიდან ირანმა თავისი სამხედრო ბიუჯეტი 40%-ით გაზარდა, დაიწყო ბირთვულქობინებიანი ბალისტიკური რაკეტების შექმნა, ხოლო უცხოეთში აქტივებზე სანქციების მოხსნის შემდეგ რესურსები ტერორიზმის დაფინანსებისათვის გამოიყენა.

ირანმა და ექვსმა შუამავალმა ქვეყანამ 2015 წლის 14 ივლისს ისტორიულ შეთანხმებას მიაღწიეს ირანული ატომის მრავალწლიანი პრობლემის დარეგულირების მიმართულებით. ამ შეთანხმების ფარგლებში მიიღეს მოქმედების გეგმა, რომლის საფუძველზეც ირანს აშშ-ის, ევროკავშირის და გაეროს უშიშროების საბჭოს მიერ დადებული ეკონომიკური და ფინანსური სანქციები უნდა მოხსნოდა. ეს გეგმა 2016 წლის 16 იანვრიდან ამოქმედდა.