მედია: მიულერის გუნდს ორი გამომძიებელი ტოვებს

ამერიკის შეერთებული შტატების სპეციალური პროკურორის რობერტ მიულერის გუნდს ორი გამომძიებელი ტოვებს. ინფორმაციას ამის შესახებ Financial Times-ი ავრცელებს.

„კაილ ფრინიმ სპეციალური პროკურორის ოფისში სამუშაო დაასრულა, ამიტომ ისევ თავის სამუშაო ადგილს დაუბრუნდება. ბრენდონ ვან გრაკი კი ეროვნული უსაფრთხოების დეპარტამენტში აგრძელებს მუშაობას“, – აღნიშნულია მიულერის ოფისის მიერ გავრცელებულ განცხადებაში.

მანამდე დაიწერა, რომ აშშ-ის გენპროკურორის მოადგილემ შესაძლოა თანამდებობა დატოვოს. როდ როზენშტეინი აშშ-ის საპრეზიდენტო არჩევნებში რუსეთის შესაძლო ჩარევის საქმეზე მიმდინარე პროცესზე ბრალმდებელია. საქმეს კი სპეცპროკურორი რობერტ მიულერი იძიებს.

ამერიკული მედიის ინფორმაციით, როზენშტაინის გადაყენებას დონალდ ტრამპი თავად აპირებდა, მას შემდეგ, რაც გავრცელდა ინფორმაცია იმის შესახებ, რომ გენერალური პროკურორის მოადგილემ კოლეგებს პრეზიდენტ ტრამპის ფარული ჩანაწერების გაკეთება შესთავაზა.

მედია წერდა, რომ გენერალური პროკურორის მოადგილე ტრამპის წინააღმდეგ შეთქმულებას გეგმავდა.  ბრალდებას როდ როზენშტეინი კატეგორიულად უარყოფს და მედიას არასწორი ინფორმაციის გავრცელებაში ადანაშაულებს. 

პრეზიდენტზე ფარული მიყურადების ინიციატივა როზენშტეინმა 2017 წელს დახურულ შეხვედრაზე წამოაყენა. ეს კი მას შემდეგ მოხდა, რაც დონალდ ტრამპმა ჯეიმს კომი გამოძიების ფედერალური ბიუროს ხელმძღვანელის თანამდებობიდან დაითხოვა.

2016 წლის დეკემბერში, აშშ-ის სპეცსამსახურებმა მოამზადეს სპეციალური ანგარიში ამერიკულ არჩევნებში რუსეთის ჩარევის შესახებ. რის შემდეგაც, კონგრესის სამმა კომიტეტმა და სპეციალურმა პროკურორმა, FBI-ს ყოფილმა დირექტორმა რობერტ მიულერმა საქმის გამოძიება დაიწყეს.

გამოძიების ფარგლებში ამოწმებენ ინფორმაციას დონალდ ტრამპის და მისი გარემოცვის რუსეთის ხელისუფლებასთან კავშირებზე. ამ საქმის ფიგურანტები არიან ტრამპის წინასაარჩევნო შტაბის ყოფილი უფროსი პოლ მანაფორტი და ტრამპის ყოფილი მრჩეველი მაიკლ ფლინი. პრეზიდენტის წინააღმდეგ მტკიცებულებების აღმოჩენის შემთხვევაში ეს შეიძლება მისი იმპიჩმენტის საფუძველი გახდეს.