„თბილისი პრაიდი“ ლევან ვასაძის განცხადებაზე სამართლებრივ რეაგირებას ითხოვს

„თბილისი პრაიდი“ ბიზნესმენ ლევან ვასაძის განცხადებას Facebook-ის საკუთარ გვერდზე გამოეხმაურა. ორგანიზაცია აცხადებს, რომ  ლევან ვასაძის განცხადება მუქარაა და რეალურ საფრთხეს შეიცავს, ამიტომ შსს-მ გამოძიება უნდა დაიწყოს. 

„ამჯერად, გუშინდელი მოვლენების ფონზე და იმის გათვალისწინებით, რომ თბილისი პრაიდის კვირეული სულ რამდენიმე დღეში იწყება, ნამდვილად შეიძლება ითქვას, რომ მუქარა არის რეალური საფრთხის შემცველი და შსს-მ სასწრაფოდ უნდა დაიწყოს ამ შემთხვევაზე გამოძიება.ასევე მოვუწოდებთ სახალხო დამცველსა და არასამთავრობო ორგანიზაციებს გააკეთონ შეფასება, შეიცავს თუ არა მოცემული განცხადება დანაშაულის ნიშნებს“, – აღნიშნულია „თბილისი პრაიდის“ გვერდზე.

ბიზნესმენმა ლევან ვასაძემ დღეს ვიდეომიმართვა გაავრცელა. ის მთავრობის კანცელარიასთან გამართულ აქციასა და „თბილისი პრაიდზე“ ლაპარაკობს.

14 ივნისს საპატრიარქომ მოუწოდა ხელისუფლებას, არ დაუშვას ლგბტ პრაიდის ჩატარება. ამის გამო, ლგბტ თემის წარმომადგელებმა და მათმა უფლებადაცველებმა აქცია გამართეს. გაიმართა კონტრაქციაც. 

კონტრაქციაზე მივიდა ლევან ვასაძეც, რომელმაც განაცხადა, რომ პრაიდის ჩატარებას არც ერთ შემთხვევაში არ დაუშვებს. ამ ორ საპროტესტო აქციას, ერთმანეთისგან პოლიციის კორდონი ჰყოფდა. 

პოლიციის მიერ დაკავებული პირებიდან 7 რჩება დროებითი მოთავსების იზოლატორში, ხოლო 21-მა პირმა გვიან ღამე ხელწერილის საუძველზე დატოვა პოლიციის განყოფილება.

„თბილისი პრაიდი“ 18 ივნისს საერთაშორისო კონფერენციით გაიხსნება და 23 ივნისს ღირსების მარშით დასრულდება.