ეუთო: საქართველოს მთავრობამ ჟურნალისტებზე თავდასხმის ყველა ინცინდენტი უნდა გამოიძიოს

ეუთოს წარმომადგენელი მედიის თავისუფლების საკითხებში ჰარლემ დეზირი თბილისში 20-21 ივნისს განვითარებული მოვლენებისას მედიის წარმომადგენლების მიმართ ძალადობის შემცველი ინციდენტებსა და არასათანადო მოპყრობას გმობს.

დეზირი აცხადებს, რომ ჟურნალისტების უსაფრთხოება ყოველთვის დაცული უნდა იყოს:

,,30 სხვადასხვა მედიაორგანიზაცია აშუქებდა 20 ივლისის მოვლენებს თბილისში, მათ შორის სააგენტო როიტერი, რადიო თავისუფალი ევროპის / რადიო თავისუფლების ქართული ბიუროები, რუსთავი 2, „სივილ ჯი“, „ნეტგაზეთი“, 1TV, ტვ პირველი, „ონ.ჯი“, OC მედია, მაესტრო, აჭარის საზოგადოებრივი მაუწყებლის ტელევიზია და რადიო, ინტერპრესნიუსი – ამ მედიების ჟურნალისტებმა სერიოზული ტრავმები მიიღეს რეზინის ტყვიებისა და ცრემლსადენი გაზით მოწამვლის შედეგად. ჟურნალისტები დემონსტრაციაზე თავდასხმის მსხვერპლად იქცნენ, რიგ შემთხვევებში მათ ართმევდნენ და უზიანებდნენ ტექნიკასა და აღჭურვილობას თბილისის საჯარო დემონსტრაციის გაშუქებისას“ - ნათქვამია ჰარლემ დეზირის განცხადებაში. 

,,ვწუხვარ თბილისის დემონსტრაციაზე გუშინ, ღამით მედიის წარმომადგენლებზე ძალადობისა და თავდასხმის თითოეული შემთხვევის გამო, რაც მედიის პლურალიზმისა და თავისუფლების სერიოზული შეფერხებაა. მასობრივი ინფორმაციის საშუალებებს აქვთ მიმდინარე საჯარო მოვლენების გაშუქების უფლება და სამართალდამცავები ვალდებულნი არიან პატივი სცენ ჟურნალისტების უფლებას გააშუქონ მოვლენები უსაფრთხოდ და თავისუფლად“, – აცხადებს ჰარლემ დეზირი.

ეუთოს წარმომადგენელი აღნიშნავს, რომ ტრავმირებულ ჟურნალისტებს შორის არიან „სივილ ჯის“ ფოტოგრაფი გურამ მურადოვი, რომელსაც რეზინის ტყვიებისგან მიყენებული 11 ჭრილობა აქვს ზურგზე, რუსთავი 2 – ის რეპორტიორმა თამარ ბაღაშვილმა კი ძვლების მოტეხილობა მიიღო. ყბის ძვლის მოტეხილობა აქვს და თვალი დაკარგა ასევე რუსთავი 2 – ის დაცვის სამსახურის წევრმა გიორგი სულაშვილმა. მოვუწოდებ საქართველოს მთავრობას დაუყოვნებლივ გამოიძიონ ჟურნალისტებზე თავდასხმის ყველა ინცინდენტი, გამოავლინონ დამნაშავეები და დააკისრონ კანონით განსაზღვრული პასუხისმგებლობა. მოვუწოდებ მთავრობას მიიღონ სასწრაფო ზომები მომავალში მსგავსი შემთხვევების თავიდან ასაცილებლად“, – აცხადებს ჰარლემ დეზირი.

მედიის თავისუფლების საკითხებში ეუთოს წარმომადგენელი მოვლენების განვითარებას ეუთოს 57 წევრ ქვეყანაში აკვირდება და შეისწავლის ამ ქვეყნებში მედიის თავისუფლების ხარისხს .

პარლამენტთან საპროტესტო აქცია განახლდა. პროტესტის მონაწილეები შს მინისტრის პასუხისმგებლობის საკითხის დაყენებას მოითხოვენ. 

გიორგი გახარიას თქმით, პოლიციამ ბოლომდე გამოიყენა თმენის ვალდებულება, ვიდრე ადამიანების სიცოცხლეს არ დაემუქრა საფრთხე. 

დღეს „ქართული ოცნების“ ოფისში პოლიტსაბჭოს დასრულების შემდეგ ოფიციალურად გახდა ცნობილი, რომ ირაკლი კობახიძემ თანამდებობა დატოვა. ამასთან, ზაქარია ქუცნაშვილი სადეპუტატო მანდატს ტოვებს. 

დღის ბოლოს შსს-ში გამართულ ბრიფინგზე ცნობილი გახდა, რომ უგულავას, მელიასა და ოქრუაშვილს ჯგუფური ძალადობის ორგანიზების საქმეზე გამოკითხავენ. 

20 ივნისს ღამით, პარლამენტის შენობის წინ სპეცრაზმმა რამდენჯერმე გამოიყენა ცრემლმდენი გაზი, ბოლოს კი აქციის მონაწილეები წყლის ჭავლით დაშალა, ასევე გამოიყენა რეზინის ტყვიები.

სამედიცინო დაწესებულებებში გადაყვანილი 240 პაციენტიდან საავადმყოფოებში რჩება 55. 

240-დან 80 იყო პოლიციელი. შსს-ს ინფორმაციით, სხვადასხვა სამართალდარღვევისთვის დაკავებულია აქციის 305 მონაწილე.

20 ივნისს, დილით პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა, რასაც საკანონმდებლო ორგანოსთან მოგვიანებით საპროტესტო აქცია მოჰყვა.