თამარ ჩუგოშვილი: ამ ცვლილებებს მხოლოდ უმრავლესობის მხარდაჭერა არ ეყოფა, საჭიროა ოპოზიციის ხმებიც

პარლამენტის ვიცესპიკერის, თამარ ჩუგოშვილის განცხადებით, მმართველ გუნდს საუბარი და კონსულტაციები სურს ყველა პოლიტიკურ ძალასთან, რომლებიც ელემენტარულად კონსტიტუციურ მოთხოვნებს სცემენ პატივს. ამის შესახებ ჩუგოშვილმა "ქართული ოცნების" ოფისში ბიძინა ივანიშვილის მიერ გამართული ბრიფინგის შემდეგ ჟურნალისტებთან განაცხადა.

მისი თქმით, 2020 წელს არჩევნების პროპორციული სისტემით ჩატარებასთან დაკავშირებულ საკონსტიტუციო ცვლილებებს არ ეყოფა მხოლოდ საპარლამენტო უმრავლესობის მხარდაჭერა, რადგან "ქართულ ოცნებას" საკონსტიტუციო უმრავლესობა არ აქვს. 

"ყველა შემთხვევაში ამ გადაწყვეტილებას დასჭირდება ოპოზიციის ხმები, ამიტომ ვაპირებთ ჩვენ მათთან საუბარს და კონსულტაციებს. რაც შეეხება ვადებს და დროებს, საკონსტიტუციო ცვლილებების მიღებას თავისი გეგმა აქვს. ინიცირებიდან 1 თვის განმავლობაში უნდა წარიმართოს საერთო სახალხო განხილვები და შემდეგ სამეტაპიანი მოსმენა საკომიტეტო და პლენარული სხდომის. ამიტომ ამას დრო დასჭირდება, მაგრამ ჩვენი მზაობაა, რომ ეს ყველაფერი განვახორციელოთ", - განაცხადა თამარ ჩუგოშვილმა. 

მისივე თქმით, მომხდარში ყველაზე ტრაგიკული და მძიმე იყო ის, რომ აუცილებელი გახდა ძალის გამოყენება იმ კრიმინალური ქმედებების გამო, რომლებსაც ადგილი ჰქონდა აქციაზე.

"როგორც მანამდე განვითარებული პროცესები, ასევე შემდგომ ძალის გადამეტების შემთხვევები - ყველაფერს სამართლებრივი პასუხი უნდა გაეცეს და პასუხი გაეცემა ღიად და გამჭვირვალედ ისე, რომ არც ერთ მხარეს შეკითხვები არ დარჩება. აქ არის საჭირო ყველა იმ პირის სამართლებრივ პასუხისგებაში მიცემა, ვისი ბრალეულობაც დადგინდება. ირაკლი კობახიძემ პოლიტიკური პასუხისმგებლობა აიღო", - განაცხადა თამარ ჩუგოშვილმა.

პარლამენტის ვიცესპიკერის თქმით, ძალის გამოყენების შემთხვევებში სადაც არაპროპორციულობა იყო, უნდა მოჰყვეს ამ შემთხვევებს სამართლებრივი რეაგირება. 

თამარ ჩუგოშვილის განცხადებით, მმართველი გუნდი მომხდარში შს მინისტრის გიორგი პასუხისმგებლობის საკითხს არ ხედავს. 

"აქციის დროს როდესაც ადამიანები ძალით ცდილობდნენ პარლამენტის შენობის შტურმით აღებას, რა თქმა უნდა გადაწყვეტილება დაშლის თაობაზე იყო ლეგიტიმური. შემდგომ განვითარებულ მოვლენებს კი სჭირდება სამართლებრივი გამოძიება და რეაგირება", - განაცხადა თამარ ჩუგოშვილმა. 

"ქართულ ოცნებაში" გამართულ ბრიფინგზე ბიძინა ივანიშვილმა განაცხადა, რომ 2020 წელს არჩევნები პროპორციული სისტემით, ნულოვანი ბარიერის პირობებში ჩატარდეს.

აქციის მონაწილეები 20 ივნისს დაკავებულების გათავისუფლებას, შინაგან საქმეთა მინისტრის გადაყენებას, არჩევნების პროპორციული წესით ჩატარებას და იმ ძალოვნების დასჯას ითხოვენ, რომელთაც მათი შეფასებით, დარბევისას ძალას გადაამეტეს.

20 ივნისს ღამით, პარლამენტის შენობის წინ სპეცრაზმმა რამდენჯერმე გამოიყენა ცრემლმდენი გაზი, ბოლოს კი აქციის მონაწილეები წყლის ჭავლით დაშალა, ასევე გამოიყენა რეზინის ტყვიები.

20 ივნისს, დილით პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა, რასაც საკანონმდებლო ორგანოსთან მოგვიანებით საპროტესტო აქცია მოჰყვა.