მამუკა ბახტაძე მომავალში კოალიციური მთავრობის შექმნას არ გამორიცხავს

როდესაც პროპორციულ სისტემაზე გადასვლისას იმის ალბათობასაც არ გამოვრიცხავთ, რომ კოალიციური მთავრობის შექმნა გახდეს საჭირო, თუმცა ეს დამოკიდებულია ჩვენი საზოგადოების არჩევანზე, - ამის შესახებ საქართველოს პრემიერმინისტრმა მამუკა ბახტაძემ ტელეკომპანია „იმედის“ გადაცემაში „პირისპირ“ განაცხადა.

მთავრობის მეთაურმა შეაფასა ინიციატივა, რომლის თანახმად 2020 წლის არჩევნები პროპორციული სისტემით, ნულოვანი ბარიერის პირობებში ჩატარდება და აღნიშნა, რომ პოლიტიკაში ახალი სახეების ნახვა ქართულ საზოგადოების დაკვეთაა.

„ბოლო არჩევნების შედეგებით ჩვენ ძალიან მნიშვნელოვანი მხარდაჭერა გვაქვს. შესაბამისად, დღევანდელი გადასახედიდან 2020 წლის ოქტომბრის არჩევნების შედეგების პროგნოზი არ იქნება რელევანტური, თუმცა იმის ალბათობა, რომ საჭირო გახდეს კოალიციური მთავრობა, ბუნებრივია, არსებობს. ეს მხოლოდ ქართველი ხალხის გადასაწყვეტია“, - განაცხადა მამუკა ბახტაძემ.

მისივე თქმით, ბიძინა ივანიშვილმა გააჟღერა უპრეცენდენტო იდეა, რომელიც ფუნდამენტურად შეცვლის პოლიტიკურ სივრცეს საქართველოში.

მთავრობის მეთაურის თქმით, აღნიშნული ინიციატივის საფუძველზე ნებისმიერი მოქალაქის ხმა იქნება წარმოდგენილი საქართველოს პარლამენტში და ქართულ პოლიტიკაში ბევრი ახალი სახე გამოჩნდება.

„ფაქტობრივად ნებისმიერი მოქალაქის ხმა იქნება წარმოდგენილი საქართველოს პარლამენტში და მე ვიმედოვნებ, რომ ბევრ ახალგაზრდას, ბევრ ახალ სახეს ვიხილავთ ქართულ პოლიტიკაში. ეს გააჯანსაღებს სიტუაციას და ეს იქნება ახალი ენერგიის და დინამიკის შემომტანი ჩვენს პოლიტიკურ ცხოვრებაში. ის დღის წესრიგი, რასაც ჩვენ აგრესიული ოპოზიცია გვთავაზობდა და რამაც საზოგადოების პოლარიზაცია გამოიწვია, ეს არის სრულიად მიუღებელი. ეს გახლდათ მხოლოდ კონტრპროდუქტიული ჩვენი სახელმწიფოს განვითარებისთვის"-განაცხადა ბახტაძემ.

„ქართულ ოცნებაში“ გამართულ ბრიფინგზე დღეს ბიძინა ივანიშვილმა განაცხადა, რომ 2020 წელს არჩევნები პროპორციული სისტემით, ნულოვანი ბარიერის პირობებში უნდა ჩატარდეს.