ოპოზიცია მელიასთვის გირაოს შეფარდებას პოლიტიკურ გადაწყვეტილებად აფასებს

ოპოზიცია „ნაციონალური მოძრაობის“ პოლიტიკური საბჭოს თავმჯდომარისთვის გირაოს შეფარდებას პოლიტიკურ გადაწყვეტილებად აფასებს.

ხელისუფლების ოპონენტები საერთაშორისო პარტნიორების წნეხზე მიუთითებენ.

„ნაციონალური მოძრაობის“ წევრის რომან გოცირიძის განცხადებით, ძალიან დიდი იყო საერთაშორისო ზეწოლა ევროკავშირიდან, აშშ-დან, ძალიან დიდი იყო საზოგადოების მღელვარება. 

„სახალხო დამცველმაც მხარი დაუჭირა ნიკა მელიას, ასევე საერთაშორისო ორგანიზაციებმა. საქმე იმდენად აშკარად იყო შეთითხნილი, რომ ექვსი მოწმიდან ოთხი იყო პოლიციელი, ორი კი-„ ქართული ოცნების“ აქტივისტი“, - განუცხადა გოცირიძემ ჟურნალისტებს სასამართლოს ეზოში. 

„ნურავინ დაიჯერებს, რომ გადაწყვეტილება მოსამართლემ მიიღო, ეს შეუძლებელია. სასამართლოსთან დაკავშირებით გადაწყვეტილებას იღებს ხელისუფლება და ბიძინა ივანიშვილი. ნიკა მელიას გათავისუფლების შესახებ დღეს გადაწყვეტილება ბიძინა ივანიშვილმა მიიღო საერთაშორისო ზეწოლის გამო“, - აღნიშნა რომან გოცირიძემ.

სასამართლოს ნიკა მელიას დაკავების გადაწყვეტილება რომ მიეღო, ეს იქნებოდა კატასტროფულად არასწორი, - მიიჩნევს „ევროპული საქართველოს“ ერთ-ერთი ლიდერი დავით ბაქრაძე. 

„დაკავების გადაწყვეტილება იქნებოდა არასწორი და მძიმე შედეგების მომტანი იმ განწყობის გათვალისწინებით, რომელიც დღეს საზოგადოებაშია იმ აქციების გათვალისწინებით, რომლიც უკვე კვირაზე მეტია მიმდინარეობს. ეს გამოშვებაც იყო პოლიტიკური გადაწყვეტილება, ოღონდ სწორი პოლიტიკური გადაწყვეტილება“, - თქვა დავით ბაქრაძემ.

„ნაციონალური მოძრაობა” პარლამენტის დღევანდელ სხდომას არ დაესწრება. ამის მიზეზად დეპუტატმა სალომე სამადაშვილმა დაასახელა საქართველოს პრემიერ-მინისტრის უარი, მისულიყო საკანონმდებლო ორგანოში.

ნიკა მელიას აღკვეთის ღონისძიების სახით 30 ათას ლარიანი გირაო შეეფარდა, დაცვის მხარე კი 10 ათას ლარიან გირაოს შეფარდებას ითხოვდა.

პოლიტიკოსი მისთვის გირაოს შეფარდებას საერთაშორისო პარტნიორების აქტიურობას უკავშირებს.