აქციის ორგანიზატორი: აუცილებლად მივალთ ყველგან სადაც გახარია იქნება

პარლამენტთან მიმდინარე აქციის ორგანიზატორები აცხადებენ, რომ უახლოეს დღეებში დემონსტრაციის ფორმატს შეცვლიან. მათი თქმით, უკვე ხუთშაბათიდან მომიტინგეებს პარლამენტის შენობასთან კონცერტს შესთავაზებენ. ასევე, გეგმავენ პარტიზანულ მისვლებს ყველა იმ ადგილზე, სადაც შინაგან საქმეთა მინისტრი გიორგი გახარია იქნება.

"შევეცდებით, რომ ფორმატი შევცვალოთ. აუცილებლად იქნება პარტიზანული მისვლები, ყველგან სადაც გახარია იქნება და ხელისუფლების წარმომადგენლები იქნებიან. ისევ ისე არ დავარღვევთ კანონს, არცერთი ნაბიჯით არ გადავუხვევთ კანონს, როგორც აქამდე, თუმცა შევუქმნით დისკომფორტს, ვინაიდან სადაც იქნებიან, გვექნება ბევრი მუსიკა, ბევრი კონცერტი. ყველაფერს გავაკეთებთ იმისთვის, რომ პროტესტი არ გაჩერდეს და დიდხანს გაგრძელდეს - მანამ, სანამ არ დასრულდება გახარიას რეჟიმი", -  თქვა გიგა მაქარაშვილმა.

პარლამენტის შენობასთან საპროტესტო აქცია განახლდა. დემონსტრანტები რუსთაველის გამზირზე ტრადიციულად 19:00 საათისთვის შეიკრიბნენ. პროტესტის მე-13 დღეს ისინი კვლავ შინაგან საქმეთა მინისტრის გიორგი გახარიას გადადგომას მოითხოვენ და ამბობენ, რომ ვიდრე ეს მოთხოვნა არ შესრულდება, საპროტესტო აქციები გაგრძელდება.

პროტესტის მონაწილეების მოთხოვნა პროპორციული არჩევნებისა და აქციის დაშლისას დაკავებულთა გათავისუფლების შესახებ დაკმაყოფილებულია.

20 ივნისს ღამით, პარლამენტის შენობის წინ სპეცრაზმმა რამდენჯერმე გამოიყენა ცრემლმდენი გაზი, ბოლოს კი აქციის მონაწილეები წყლის ჭავლით დაშალა, ასევე გამოიყენა რეზინის ტყვიები. 

ამას კი წინ უძღოდა პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებისადმი რუსეთის დუმის კომუნისტური პარტიის წევრის სერგეი გავრილოვის მიმართვა, რასაც საკანონმდებლო ორგანოს შენობასთან საპროტესტო აქცია მოჰყვა.