გოცირიძე: გაბუნია ჟურნალისტიკის ისტორიაში შევა როგორც უხამსობის ეტალონი

გაბუნია ჟურნალისტიკის ისტორიაში შევა როგორც უხამსობის ეტალონი და გაინაღდა სახელმძღვანელოებში მოხვედრა პუტინის მასშტაბიდან გამომდინარე, ამავე დროს, საქართველოსთვის ის შეიძლება გახდეს ის ადამიანი, რომელმაც საბოლოოდ ჩამოხადა ნიღაბი საქართველოს მოღალატე ხელისუფლებას და ხელი შეუწყო მისი შეცვლის პროცესს, - ამის შესახებ ფრაქცია „ნაციონალური მოძრაობის“ თავმჯდომარემ რომან გოცირიძემ განაცხადა.

მისივე თქმით, გაბუნიას სამარცხვინო საქციელმა იმაზე მეტი გვაჩვენა, ვიდრე მოსალოდნელი იყო და ზიანი გასცდა ერთი ჟურნალისტის ან ტელევიზიის ფარგლებს, მაგრამ ამავე დროს მისი მამხილებელი ეფექტი შეიძლება გახდეს საზოგადოების თვალის ახელის მნიშვნელოვანი ფაქტორი.

„ამ ინციდენტმა მთელი სიგრძე-სიგანით წარმოაჩინა ის საფრთხეები, რაც ქვეყნის წინაშე დგას, თვალნათელი გახადა ივანიშვილის ხელისუფლების ნამდვილი ბუნება.

საქართველოს ჰყავს რუსეთის მორჩილი ხელისუფლება, რომელსაც არ შესწევს არავითარი უნარი, დაიცვას ქვეყანა და უზრუნველყოს მისი დემოკრატიული განვითარება.

საქართველოში მოქმედებს რუსული აგენტურის უდიდესი ქსელი, რომელიც მოქცეულია პარტიულ, საეკლესიო, არასამთავრობო, ბიზნესის თუ სხვა სახის საბურველს ქვეშ. ამ ქსელს ძალიან დიდი გავლენა აქვს დაინტერესებულ წრეებზე და გაღატაკებულ მასაზე, რომელიც გაუცნობიერებლად ხდება რუსული ინტერესების გამტარებელი ქვეყანაში.

გაბუნია ჟურნალისტიკის ისტორიაში შევა როგორც უხამსობის ეტალონი და გაინაღდა სახელმძღვანელოებში მოხვედრა პუტინის მასშტაბიდან გამომდინარე, ამავე დროს, საქართველოსთვის ის შეიძლება გახდეს ის ადამიანი, რომელმაც საბოლოოდ ჩამოხადა ნიღაბი საქართველოს მოღალატე ხელისუფლებას და ხელი შეუწყო მისი შეცვლის პროცესს“, - წერს გოცირიძე Facebook-ის საკუთარ გვერდზე.

ტელეკომპანია „რუსთავი 2“-ის პირდაპირ ეთერში, გადაცემა „P.S“-ის წამყვანმა, გიორგი გაბუნიამ რუსეთის პრეზიდენტს ვლადიმერ პუტინს რუსულად არაეთიკურად მიმართა, რასაც მოქალაქეების ნაწილის გაღიზიანება და აქცია მოჰყვა.

"რუსთავი 2"-ის პირდაპირი ეთერიდან წამყვანის მიერ წარმოთქმულ სიტყვებთან დაკავშირებით, განცხადება გაავრცელა საქართველოს ჟურნალისტური ეთიკის ქარტიამაც.

გაბუნიას მონოლოგი გააკრიტიკა არხის გენერალურმა დირექტორმა ნიკა გვარამიამაც.