რუსეთის საგარეო უწყება: ვხედავთ ქართული საზოგადოების სამართლიან აღშფოთებას

რუსეთის საგარეო საქმეთა სამინისტრო საერთაშორისო ორგანიზაციებს ტელეკომპანია „რუსთავი 2“-ის ტელეწამყვანის გიორგი გაბუნიას მონოლოგზე რეაგირებისკენ მოუწოდებს. ამის შესახებ უწყების მიერ გავრცელებულ კომენტარშია ნათქვამი.

„კატეგორიულად ვგმობთ უპრეცედენტო და საძაგელ გამოხტომას. ამ ინციდენტს განვიხილავთ, როგორც კიდევ ერთ ღია პროვოკაციას ქართველი რადიკალური ძალების მხრიდან, რომელიც რუსულ-ქართული ურთიერთობების გაუარესებას ისახავს მიზნად. ეს აღმაშფოთებელი ინციდენტი ნათლად აჩვენებს, სად შეიძლება შეგიყვანოს აღვირახსნილმა რუსოფობიამ.

აღსანიშნავია, რომ ამჯერად, 20 ივნისის მოვლენებისგან განსხვავებით, საქართველოს ხელისუფლებას არ უცდია რადიკალების გამართლება და პროვოკატორებისგან გამიჯვნა და მათი დაგმობა გადაწყვიტა. ვხედავთ იმ სამართლიან აღშფოთებასაც, რომელიც მომხდარს ქართულ საზოგადოებაში მოჰყვა.

ველოდებით ადეკვატურ რეაგირებას პროფილური საერთაშორისო და რეგიონული ორგანიზაციებისგან და ჟურნალისტური წრეებისგან. ცივილიზებულ ქვეყნებში ასეთი შემთხვევების ადგილი არაა“, - ნათქვამია რუსეთის საგარეო უწყების განცხადებაში.

ტელეკომპანია „რუსთავი 2“-ის პირდაპირ ეთერში, გადაცემა „P.S“-ის წამყვანმა, გიორგი გაბუნიამ რუსეთის პრეზიდენტს ვლადიმერ პუტინს რუსულად არაეთიკურად მიმართა, რასაც მოქალაქეების ნაწილის გაღიზიანება და აქცია მოჰყვა.

„რუსთავი 2“-ის პირდაპირი ეთერიდან წამყვანის მიერ წარმოთქმულ სიტყვებთან დაკავშირებით, განცხადება გაავრცელა საქართველოს ჟურნალისტური ეთიკის ქარტიამაც.

გაბუნიას მონოლოგი გააკრიტიკა არხის გენერალურმა დირექტორმა ნიკა გვარამიამაც.