ახალი გენერალური დირექტორი თანამშრომლებთან შესახვედრად „რუსთავი 2“-ში მივიდა

„რუსთავი 2“-ის ახალი გენერალური დირექტორი პაატა სალია ტელეკომპანიის შენობაში მივიდა. როგორც სალია ამბობს, გუშინაც ჰქონდა დიალოგის მცდელობა, მაგრამ ეს ვერ მოხერხდა. რაც შეეხება საკადრო ცვლილებებს, სალიას თქმით, ჯერჯერობით ამას არ აპირებს და სურს, ტელევიზიის თანამშრომლები გაიცნოს და ტელევიზიაში არსებულ ფინანსურ სიტუაციას გაეცნოს. 

"გუშინ სწორედ ამ მიზნით მოვედი, რომ დამეწყო კომპანიაში არსებული ვითარების გაცნობა. პირველ რიგში გამეგო თანამშრომლების ვინაობა და შემდგომ უკლებლივ ყველას შევხვედროდი, და პარალელურად დაგვეწყო იმ საკითხებზე მუშაობა, რაც აუცილებელია კომპანიის ყოველდღიური შეუფერხებელი საქმიანობისთვის. დღესაც იგივე მიზნით ვარ მოსული. გუშინ განმიცხადეს, რომ სამუშაო საათები დასრულებულია და ადამიანები, ვინც ამ ფუნქციებს ასრულებდნენ წასულები იყვნენ. შესაბამისად, მოვედი ისეთ დროს, როცა ვვარაუდობ, რომ ყველა ადგილზე უნდა იყოს. შევალ და გავესაუბრები", - განაცხადა პაატა სალიამ.

როგორც 18 ივლისს საჯარო რეესტრის ვებგვერდზე გამოქვეყნებულ დოკუმენტაცში წერია, შპს „სამაუწყებლო კომპანია „რუსთავი 2“-ის პარტნიორთა კრების გადაწყვეტილებით, ნიკა გვარამია გათავისუფლდა ტელეკომპანიის დირექტორის თანამდებობიდან და დირექტორად პაატა სალია დაინიშნა. მანამდე საჯარო რეესტრმა „რუსთავი 2“ ქიბარ ხალვაშს გადაუფორმა.

სტრასბურგში ადამიანის უფლებათა ევროპულმა სასამართლომ „რუსთავის 2“-ის საქმეზე გადაწყვეტილება გამოაცხადა. სტრასბურგის სასამართლოს განცხადებით, „რუსთავი 2“-თან მიმართებით ადამიანის უფლებათა ევროპული კონვენციის არც ერთი მუხლი არ დარღვეულა, მათ შორის არც სამართლიანი სასამართლოს უფლება. 

წულუკიანის თქმით, სახელმწიფოს გადასაწყვეტი არ არის, როდის უნდა აღსრულდეს გადაწყვეტილება და ახალ მესაკუთრეს აქვს გადაწყვეტილების მიღების თავისუფლება. 

განცხადება გაავრცელეს „რუსთავის 2“-ს თანამშრომლებმა, რომელშიც ამბობენ, რომ მენეჯმენტის შეცვლა სარედაქციო პოლიტიკის შეცვლას გამოიწვევს, სწორედ ამიტომ, იუსტიციის სამინისტროს მოუწოდებდნენ, არ დაარეგისტრირებინა ადვოკატ პაატა სალიას მოთხოვნა არხის მესაკუთრედ ხალვაშის დარეგისტრირების შესახებ. 

ამასთან, სტრასბურგის სასამართლომ გააუქმა საქართველოს უზენაესი სასამართლოს გადაწყვეტილების აღსრულების შემაჩერებელი მექანიზმი. კერძოდ, 2017 წლის 2 მარტს საქართველოს უზენაესი სასამართლოს დიდმა პალატამ ტელეკომპანია „რუსთავი 2“ ქიბარ ხალვაშს მიაკუთვნა. იმავე წლის 3 მარტს კი, „რუსთავი 2“-ს მიმართვის საფუძველზე, სტრასბურგის სასამართლომ უზენაესი სასამართლოს გადაწყვეტილების აღსრულება შეაჩერა. სწორედ ამ აღსრულების შეჩერება გააუქმა დღეს სტრასბურგის სასამართლომ.

მხარეებს სტრასბურგის სასამართლოს გადაწყვეტილების დიდ პალატაში გასაჩივრებისთვის სამთვიანი ვადა აქვთ. თუ გადაწყვეტილება აღნიშნულ ვადაში არ გასაჩივრდა, სამი თვის შემდეგ ის ამოქმედდება.

„რუსთავი 2“ ადამიანის უფლებათა ევროპულ სასამართლოში 4 მუხლით დავობდა, მათ შორის სამართლიანი სასამართლოს უფლების დარღვევის გამო.

18 ივლისს ქიბარ ხალვაშმა „რუსთავი 2“-ს გენერალურ დირექტორად პაატა სალია დანიშნა, რომელმაც ამ პოზიციაზე ნიკა გვარამია შეცვალა.