ხაზარაძე: ჩვენ ქვეყანა არ გვაქვს, მას ერთი პირი მართავს

„ზოგი ჭირი მარგებელია, საბედნიეროდ, დღეს ვიყავი აქ, სასამართლოში და კარგად დავინახე, რა ჭაობშია ქვეყანა“, - ამის შესახებ სასამართლოს მიერ 700 000 ლარიანი გირაოს შეფარდების შემდეგ „თიბისი ბანკის“ დამფუძნებელმა მამუკა ხაზარაძემ განაცხადა.

მისი თქმით, ქვეყანას მართავს ერთი პირი, რომელსაც ცუდი შემსრულებლები ჰყავს. 

„დღეს მე დავინახე სრული ჭაობი, კარგია, რომ ეს ჩემ თავზე დავინახე, მე დავინახე უცოდინარობის პიკი პროკურატურის მხრიდან. მე ეს ადამიანები გულწრფელად მეცოდებიან. ერთ-ერთი პროკურორი, რომელსაც შეუძლია, 5-წუთიანი ბრიფინგით საქართველოს ეკონომიკას ცელი გამოუსვას და არავინ ამაზე პასუხს არ თხოვს, ეს არის კატასტროფა. ჩვენ ქვეყანა არ გვაქვს. ინსტიტუციები მოშლილია“, - განაცხადა ხაზარაძემ. 

მისივე თქმით, მის მიერ დაფუძნებული საზოგადოებრივი მოძრაობის გეგმებზეც მალე გახდება ცნობილი და აქ იქნებიან ადამიანები, რომლებიც ებრძვიან ოკუპაციას. 

„დღეს ერთი პირი მართავს ქვეყანას ინსტიტუციების გარეშე, ეს არის დირიჟორი ამ ქვეყნის. მას ჰყავს ძალიან ცუდი შემსრულებლები. გპირდებით, რომ ეს ბრძოლა გაგრძელდება იმისთვის, რომ ქვეყანა, ეს ჭაობი შეიცვალოს; რომ პროკურორები იყვნენ კანონმორჩილები და მოსამართლეები თავისუფლები. გარანტიას გაძლევთ, ეს ყველაფერი დამთავრდება. ესენი სახლში წავლენ. ყველანი გონს მოეგონ. მეგობრებო, ეს არის სირცხვილი“, - განაცხადა მამუკა ხაზარაძემ. 

მამუკა ხაზარაძესა და ბადრი ჯაფარიძეს აღკვეთის ღონისძიების სახით თითოეულს 700 000 ლარიანი გირაო შეუფარდა. შესაბამისი გადაწყვეტილება მოსამართლე ნინო ჩახნაშვილმა მიიღო. ბრალდებულებს აეკრძალათ საქართველოს საზღვრის დატოვება საგამოძიებო უწყების ინფორმირების გარეშე. 

სასამართლომ მამუკა ხაზარაძესა და ბადრი ჯაფარიძეს აღკვეთის ღონისძიების სახით თითოეულს 700 000 ლარიანი გირაო შეუფარდა. როგორც ცნობილია პროკურატურა მილიონიან გირაოს მოითხოვდა.

საქართველოს გენერალური პროკურატურა „თიბისი ბანკის საქმეზე“ გამოძიებას უკანონო შემოსავლის ლეგალიზაციის ფაქტზე აწარმოებს. საუბარია 17 მილიონ დოლარზე. 

8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში "თიბისი ბანკიდან" გარკვეული დოკუმენტაცია ამოიღო.

9 ივლისს კი გაირკვა, რომ მამუკა ხაზარაძე საზოგადოებრივ მოძრაობას აფუძნებს.