ეკა ბესელია ამბობს, რომ მოსამართლეების სიიდან 5 კანდიდატის მხარდაჭერა მას ივანიშვილმა მოსთხოვა

პარლამენტის დამოუკიდებელმა დეპუტატმა ეკა ბესელიამ ჟურნალისტებთან უზენაესი სასამართლოს მოსამართლეობის კანდიდატებზე ისაუბრა და განაცხადა, რომ მას სწორედ ბიძინა ივანიშვილმა მოსთხოვა დეკემბერში წარდგენილი 10-კაციანი სიიდან 5 კანდიდატისთვის მხარი დაეჭირა. ბესელიას განცხადებით, შეხვედრას უმრავლესობის წევრი თამარ ჩუგოშვილიც ესწრებოდა. 

„შეხვედრაზე პირდაპირ ითქვა, რომ დავთანხმებულიყავი - 5 მოსამართლე მაინც გაგვეყვანა 10-კაციანი სიიდან. მათ შორის პირველი ვისი გვარიც მახსოვს, იყო ჩინჩალაძე. კატეგორიული უარი ვთქვი. მიმაჩნდა, რომ ის სია მთლიანად მიუღებელი იყო, რადგან იქ იყვნენ მოსამართლეები, რომლებიც სწორედ წარსულის ძალადობრივ სისტემას ამყარებდნენ. პროცედურაც აბსოლუტურად უკანონო იყო, რადგან როგორც ირაკლი კობახიძე ითხოვდა, სია ნაჩქარევად - პარასკევს კომიტეტის სხდომაზე და შემდეგ სესიაზე უნდა გამეტანა. არ ვიცი თამარ ჩუგოშვილი ამას დაადასტურებს თუ არა, მაგრამ იმ შეხვედრაზე მასაც კრიტიკული პოზიცია ჰქონდა“, - აცხადებს ბესელია, რომელიც შეხვედრის ზუსტ თარიღს არ აკონკრეტებს.

ეკა ბესელიას ამ განცხადებას თამარ ჩუგოშვილი ჟურნალისტებთან უკვე გამოეხმაურა და განმარტა, რომ სასამართლოების თემაზე არაერთი შეხვედრა შედგა, თუმცა კონკრეტულად ვინმესთვის ხმის მიცემაზე საუბარი არ ყოფილა.

„სასამართლოების თემაზე არაერთი შეხვედრა გვქონია. რამდენიმე შეხვედრა იყო, რომელსაც უმრავლესობის სხვადასხვა წევრი ესწრებოდა. ერთ-ერთ შეხვედრა იყო, სადაც მე და ეკა ბესელია ერთად ვიყავით. ყველა შეხვედრა იმას ეხებოდა, როგორ უნდა გაგრძელებულიყო მოსამართლეების დანიშვნის პროცესი მას შემდეგ, რაც იუსტიციის საბჭომ ათკაციანი სია გამოაგზავნა. ჩვენ, მეც და ჩემი კოლეგები ამ სიას ვეწინააღმდეგებოდით. ჩემი პოზიცია ამ სიასთან დაკავშირებით იყო და რჩება შემდეგი, რომ მოსამართლეების დანიშვნა იმ ფორმით და სახით, როგორც იუსტიციის საბჭომ მოინდომა დეკემბერში, მიუღებელი იყო და ამას პარლამენტი მხარს არ დაუჭერდა. ეს ასეც მოხდა. პარლამენტს იმ სიის განხილვა არ დაუწყია, რადგან შევთანხმდით, რომ ჯერ პარლამენტს უნდა მიეღო კანონი, რომელიც შესაბამისი პროცესის შექმნას ითვალისწინებდა და ხანგრძლივი, რთული, გამჭვირვალე პროცესის წარმოებას მოსართლეების დანიშვნისთვის. კონკრეტულად ვინმესთვის ხმის მიცემაზე საუბარი არ ყოფილა. მხოლოდ იმაზე ვსაუბრობდით, მოსამართლეების დანიშვნის საკითხი როგორ უნდა გაგრძელებულიყო იმის გამო, რომ საბჭოს მოქმედებებმა, მის მიერ წარმოდგენილმა სიამ დიდი პროტესტი გამოიწვია დეპუტატებშიც და საზოგადოებაშიც“, - განაცხადა თამარ ჩუგოშვილმა.

გუშინ, 26 სექტემბერს, პარლამენტში უზენაესი სასამართლოს მოსამართლეობის კანდიდატის მოსმენის დროს ეკა ბესელია უმრავლესობის დეპუტატ ვანო ზარდიაშვილს ფიზიკურადაც დაუპირისპირდა, რაც კამათის დროს ზარდიაშვილის მხრიდან ბესელიას მორალზე მინიშნებას მოჰყვა. 

2018 წლის 4 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა.

კანდიდატები იყვნენ: მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე და გიორგი მიქაუტაძე.

მოსამართლეთა სიამ მმართველ გუნდსა და საზოგადოებაში მწვავე კრიტიკა და დისკუსია გამოიწვია. შესაბამისად, პარლამენტს განახლებული სია წარედგინა. 

უზენაესი სასამართლოს მოსამართლეობის კანდიდატებთან გასაუბრება პარლამენტში გრძელდება. დღეს იურიდიულ საკითხთა კომიტეტის სხდომაზე დეპუტატების კითხვებს საქართველოს გენერალური პროკურორის პირველი მოადგილე მამუკა ვასაძე პასუხობს.

დამოუკიდებელმა იურისტებმა კანდიდატების წინააღმდეგ აქციაც გამართეს და განაცხადეს, რომ უვადოდ დასამტკიცებელი მოსამართლეების 20-კაციანი სია სუბიექტური კრიტერიუმებით შეირჩა.

იურიდიულ საკითხთა კომიტეტმა უზენაესი სასამართლოს მოსამართლეობის კანდიდატების მოსმენა 23 სექტემბერს დაიწყო. წინა დღეების განმავლობაში პარლამენტის იურიდიულ კომიტეტში უკვე მოუსმინეს უვადო მოსამართლეობის კანდიდატებს: შოთა გეწაძეს, მერაბ გაბინაშვილს, თამარ ალანიასა და მირანდა ერემაძეს.

შერჩეულ კანდიდატთა 50-კაციანი სია იხილეთ ამ ბმულზე.

საქართველოს პარლამენტში უზენაესი სასამართლოს მოსამართლეთა არჩევის პროცედურის შესახებ ვრცლად შეგიძლიათ ამ ბმულზე წაიკითხოთ.