თადუმაძე ბოკერიას: 2001 წელს მაგ დიპლომით თავისუფლების ინსტიტუტს ავყავდი ადვოკატად

2001 წელს თავისუფლების ინსტიტუტს ავყავდი მაგ დიპლომით ადვოკატად სამხედრო მოსამსახურეების დარღვეულ უფლებაზე და იმ ორგანიზაციის წარმომადგენელი თქვენ იყავით, - ასე უპასუხა უზენაესი სასამართლოს მოსამართლეობის კანდიდატმა შალვა თადუმაძემ დეპუტატ გიგა ბოკერიას დიპლომთან დაკავშირებით დასმული კითხვის პასუხად.

„ეგ ბირთვული იარაღის ფორმულა სადაც მომთხოვეს, საკუთარი ნებით გამოვაქვეყნე და ხელი მოვაწერე, რომ თანახმა ვარ გადაამოწმოთ მისი უტყუარობა, შეისწავლოთ მისი ნამდვილობა და შემდეგ შეგვიძლია ვილაპარაკოთ“, - მიმართა თადუმაძემ ბოკერიას.

ბოკერიამ აღნიშნა, რომ თადუმაძის დიპლომი „ლამის ბირთვული იარაღის რაღაც საიდუმლო ფორმულად გაასაღეს“.

„დიპლომთან დაკავშირებით, განსაკუთრებით თქვენგან მიკვირს ბატონო გიგა. 2001 წელს თავისუფლების ინსტიტუტს ავყავდი მაგ დიპლომით ადვოკატად სამხედრო მოსამსახურეების დარღვეულ უფლებაზე და იმ ორგანიზაციის წარმომადგენელი თქვენ იყავით. ცოტა უხერხულია, თქვენ მელაპარაკებით მე კვალიფიკაციაზე და იურისტის დიპლომზე. მიზანი არის ის, რომ თქვენ შექმნათ ახლა ის ლეგენდა“, - მიმართა შალვა თადუმაძემ ბოკერიას.

გენპროკურორმა ასევე განმარტა, რატომ ფიგურირებს მის დიპლომში ჩაბარების თარიღად  1993 წელი, როცა უმაღლესი სასწავლებელი 1994 წელს დაარსდა. ამის შესახებ მან დეპუტატების შეკითხვას პარლამენტის იურიდიულ საკითხთა კომიტეტის სხდომაზე უპასუხა, სადაც უზენაესი მოსამართლეობის კანდიდატს უსმენენ. 

უვადო მოსამართლეობის კანდიდატი შალვა თადუმაძე განმარტავს, როგორ ჩააბარა კონკრეტულ ინსტიტუტში 1993 წელს, როცა თავად უმაღლესი სასწავლებელი 1994 წელს დაარსდა.

„1994 წელს ჩავაბარე ინსტიტუტში, რომელიც დავამთავრე 1998-ში, თუმცა 1997 წელს მიღებული კანონის საფუძველზე, დიპლომის გამცემი ვალდებული იყო ჩაეწერა სასწავლო პროგრამის ხანგრძლივობა და ვინაიდან ჩემი პროგრამა 5-წლიანი იყო და მე ექსტერნატის ფორმით ჩავაბარე გამოცდები, ინსტიტუტში სწავლის ხანგრძლივობად მიუთითეს 1993 -98 წლები“, - განაცხადა თადუმაძემ.

რაც შეეხება სასწავლებლის იურიდიულ სახელწოდებას, რაზეც ასევე არსებობს კითხვები, თადუმაძე ამბობს, რომ მისი სწავლის პერიოდში ინსტიტუტი იმ სახელწოდებით ოპერირებდა, რაც დიპლომშია მითითებული.

„ნოდარ დუმბაძის სახელობის თბილისის ჰუმანიტარული ინსტიტუტი - ეს არის მითითებული. მე დავამთავრე ის 1998 -ში. საგადასახადოში რა ერქვა არ ვიცი, მაგრამ ბეჭდებზე და იმ დიპლომზე, რომელსაც თავისი სარეგისტრაციო ნომერი გააჩნია, ყველგან ესაა მითითებული. სარეგისტრაციო სახელი სხვაა და საწარმოო სახელი სხვა“, - განაცხადა თადუმაძემ.

მანამდე თადუმაძემ განაცხადა, რომ წელიწადნახევარია, ადამიანთა ჯგუფი ცდილობს, შექმნას ლეგენდა, რომ ამ ქვეყანას ჰყავს უდიპლომო გენერალური პროკურორი, ახლა არის მცდელობა, შექმნან ლეგენდა, რომ ამ ქვეყანას ეყოლება უდიპლომო უზენაესი სასამართლოს მოსამართლე.

„საერთაშორისო გამჭვირვალობა-საქართველოს“ ინფორმაციით, თადუმაძის დიპლომში მითითებულია, რომ მან დუმბაძის სახელობის თბილისის ჰუმანიტარულ ინსტიტუტში 1993 წელს ჩააბარა, მაშინ, როდესაც თავად ინსტიტუტი მომდევნო წელს დაფუძნდა. ორგანიზაციის ცნობით, შეუსაბამობა იკვეთება სასწავლებლის დამთავრების თარიღთან დაკავშირებითაც.