წულუკიანი მამა პეტრეზე: როდესაც გხსნიან, არ უნდა გახდე „დასაბმელი“

„ეკლესია და სახელმწიფო გაყოფილია, ეს ასეა ტრადიციულად, მაგრამ ეს არ ნიშნავს იმას, რომ ჩვენ როგორც საერო ხელისუფლება შევეგუებით, რომ ეკლესიის ხელმძღვანელი იყოს შეურაცხჰყოფის, უსაფუძვლო ბრალდებების და დამცირების საგანი,“- ეს განცხადება იუსტიციის მინისტრმა თეა წულუკიანმა „დღის ქრონიკის“ პირდაპირ ეთერში გააკეთა. 

მისი თქმით, ხელისუფლება ამას არ შეეგუება არა მხოლოდ კონკრეტული პატრიარქის პიროვნებიდან გამომდინარე: 

„ეკლესიაში სიმშვიდე არის სახელმწიფოებრივად და ეროვნული უშიშროების ჭრილშიც ძალიან მნიშვნელოვანი საკითხი. ამიტომაც ამგვარი ტიპის თავდასხმებს პატრიარქზე საერო ხელისუფლება არ შეეგუება. ის რაც უკვე დღეს აწ უკვე ბატონმა პეტრემ იკადრა ამას ვგმობთ ცალსახად. მე თავს ვიკავებ რაიმე არ წამომცდეს რაც ამ სტატუსის შეუფერებელი იქნებოდა, იმიტომ რომ, როდესაც ადამიანს გხსნიან ( ჩვენს საერო ენაზე ამას ასე ჰქვია), მაშინ არ უნდა გახდე „დასაბმელი“. თუკი რაიმე კრიტიკა გაქვს შიგნით უნდა თქვა. და მხოლოდ მაშინ არ უნდა თქვა, როცა თანამდებობას საფრთხე ემუქრება არ უნდა ჩავარდე ისტერიკაში,“- განაცხადა თეა წულუკიანმა. 

მისი თქმით ილია მეორეს ვერ დააბრალებ იმას, რომ ან სათანადოდ გულმოწყალე არ არის, შემწყნარებელი არ არის და ან არ შეუძლია მოგისმინოს:

„თუნდაც მწვავე კრიტიკა შესაძლებელია მას გაუზიარო. მაგრამ როცა გამოძრავებს აბსოლიტურად სხვა რამ მაშინ იქცევი ისე, როგორც მოიქცა დღეს აწ უკვე ყოფილი მეუფე პეტრე. პეტრემ აჩვენა საზოგადოებას თუ რა ამოძრავებს მას. გარკვეული ამბიციები და ვნებათაღელვა. მეუფეს რომელსაც კაბა აცვია აქვს ვალდებულება უფრო მეტი სულიერების“ , - განაცხადა იუსტიციის მინისტრმა. 

დღეს საპატრიარქოში სინოდის სხდომა გაიმართა. სხდომიდან პირველი პეტრე ცაავა გამოვიდა, რომელმაც თქვა, რომ პატრიარქმა ის მღდელმთავრობიდან გადააყენა. მან ასევე განაცხადა, რომ „ერს ჰყავს პიდარასტიის, მამათმავლობის ცოდვით შეპყრობილი სინოდის თავმჯდომარე“. მოგვიანებით მან ეს სიტყვები განმარტა. 

სინოდის სხდომის შემდეგ ცნობილი გახდა, რომ პეტრე ცაავა წალკელმა ეპისკოპოსმა მეუფე გრიგოლმა შეცვალა, ხოლო მეუფე იაკობს, რომელიც ამბობდა, რომ ყოფილი და მოქმედი მაღალჩინოსნები მას პატრიარქის გადაყენებაში დახმარებას სთხოვდნენ, მღვდელმთავრობა შეუნარჩუნდა. 

სინოდის სხდომა საერო ხელისუფლებამაც შეაფასა.