ირმა ინაშვილი პეტრე ცაავას განცხადებაზე: თავ-ყბას დავუნგრევთ, თუ ასე გააგრძელებენ

„პატრიოტთა ალიანსის“ ერთ-ერთი ლიდერის, ირმა ინაშვილის განცხადებით ის, რაც საქართველოს ეკლესიაში დღეს ხდება, ახლა არ დაწყებულა. ინაშვილის თქმით, ეს ჯერ კიდევ „ვარდების რევოლუციამდე“ დაიწყო, როდესაც „კონკრეტულად „თავისუფლების ინსტიტუტი“, ლევან რამიშვილი, ნოდარ ლადარია, იგივე ლაშა ბუღაძე და სხვები გეგმავდნენ, ტელევიზიაში იყვნენ მოსული და გეგმავდნენ ეკლესიის საწინააღმდეგო გადაცემების მომზადებას“, - ამბობს ინაშვილი. მის კომენტარს 1tv.ge ავრცელებს.

ირმა ინაშვილის თქმით, ჩაფიქრებული იყო ტყუილის, ცილისწამების, შავი პიარის გეგმა და ეს გეგმა სააკაშვილისა და ბოკერიას გუნდს ჰქონდა, რომელიც ინაშვილის თქმით, მან ჩაშალა. რაც შეეხება პეტრე ცაავას დღევანდელ განცხადებას, ინაშვილი ამბობს, რომ ის ყოფილ მღვდელმთავარს, პეტრე ცაავას არა მეუფედ, არამედ „ცრუ პეტრედ“ იხსენიებდა.

„მე არასდროს მომიხსენიებია პეტრე მეუფედ, მას ყოველთვის ვიხსენიებდი „ცრუ პეტრედ“, რომელიც ნამდვილად აცდენილი იყო მეუფის ყველა სტანდარტს, მისი აზროვნებიდან, ლექსიკიდან გამომდინარე. დღეს ეს კიდევ ერთხელ გამოჩნდა და ძალიან სწორი გადწყვეტილება მიიღო სინოდმა პეტრესთან მიმართებაში. ასეთი ხალხისგან ეკლესია უნდა განიწმინდოს და როცა გამოსავალზე ვლაპარაკობთ, მე არ ვარ საქართველოს კათალიკოს-პატრიარქზე ჭკვიანი, იმედი მაქვს, მისი ბრძნული გადაწყვეტილების. ზუსტად ვიცი, სინოდშიც არის არაერთი, უმრავლესობაში არიან წესიერი, ბრძენი, ძალიან ჭკვიანი მეუფეები. მარტო ის რამდენიმე ოდიოზური პეტრე კი არა ჰყავს სინოდს, საბედნიეროდ, ძალიან ბევრი წესიერი და პატიოსანი მღვდელმთავარი გვყავს და სწორედ ამ ხალხის გადასაწყვეტია ვითარება, რაც ეკლესიის გარშემოა შექმნილი, როგორ ჩაქრეს და დამშვიდდეს. სწორი გადაწყვეტილება მიიღეს დღეს, რომ პეტრე აღარ არის და არის მოქალაქე პეტრე. ძალიან კარგია ეს და ფრთხილად იყოს ეგ პეტრე, მაგას თავ-ყბას დავუნგრევთ ჩვენ თუ ეგრე გააგრძელებს, ეს არის ჩემი გზავნილი პეტრესადმი და სხვა აგენტურისადმი, ვინც ჩანერგა ბოკერია-სააკაშვილმა ეკლესიაში“, - განაცხადა ირმა ინაშვილმა.

დღეს საპატრიარქოში სინოდის სხდომა გაიმართა. სხდომიდან პირველი პეტრე ცაავა გამოვიდა, რომელმაც თქვა, რომ პატრიარქმა ის მღდელმთავრობიდან გადააყენა. მან ასევე განაცხადა, რომ „ერს ჰყავს პედარასტიის, მამათმავლობის ცოდვით შეპყრობილი სინოდის თავმჯდომარე“. მოგვიანებით მან ეს სიტყვები განმარტა. 

სინოდის სხდომის შემდეგ ცნობილი გახდა, რომ პეტრე ცაავა წალკელმა ეპისკოპოსმა მეუფე გრიგოლმა შეცვალა, ხოლო მეუფე იაკობს, რომელიც ამბობდა, რომ ყოფილი და მოქმედი მაღალჩინოსნები მას პატრიარქის გადაყენებაში დახმარებას სთხოვდნენ, მღვდელმთავრობა შეუნარჩუნდა. 

სინოდის სხდომა საერო ხელისუფლებამაც შეაფასა, საქართველოს პრემიერმინისტრი კი თურქეთიდან გამოეხმაურა.