რამდენიმე სასულიერო პირმა შესაძლოა ჭყონდიდის ეპარქია დატოვოს

ჭყონდიდის ყოფილი მიტროპოლიტი ეპარქიაში შემავალი ეკლესიების წარმომადგენლებს ხვდება. შეხვედრა უკავშირდება 31 ოქტომბერს გამართული სინოდის სხდომის დეტალებს. მანამდე მეუფე პეტრემ მედიასთან განაცხადა, რომ ის რჩება ერისა და ეკლესიის სამსახურში, როგორც ბერი. 

მარტვილში წალკელ ეპისკოპოსს მეუფე გრიგოლს ელოდებიან. მანამდე კი სასულიერო პირებმა შექმნილი ვითარება შეაფასეს. Imedinews-ის ინფორმაციით არ არის გამორიცხული რომ მეუფე გრიგოლის ჩამოსვლის შემდეგ რამდენიმე სასულიერო პირმა დატოვოს ეპარქია, რადგან განმარტავენ, რომ მეუფე გრიგოლთან ერთად წირვაში მონაწილეობის მიღებას არ აპირებენ. სასულიერო პირები წმინდა სინოდის გადაწყვეტილებას მეუფე პეტრესთვის სტატუსის შეჩერების შესახებ არ ეთანხმებიან: 

„1937 წლიდან, განკვეთილი მღვდელმთავრების და მღვდლების ბიოგრაფიების შესწავლა დაგვევალა. ვარკვევთ ეს რამდენად კანონიერი იყო და ზოგიერთ მათგანს სტატუსი სიკვდილის შემდეგ აღუდგინეს და ისევ მიტროპოლიტობა მიანიჭეს. ეს ბიოგრაფიები იქნეს გამოძიებული და მიჩუმათებულ ფაქტები იქნეს განხილული. მამა პეტრესთან მიმართებით გადაწყვეტილება იყო უსამართლო,“- აცხადებს მღვდელმონაზონი ანდრია სარია. 

„მჯერა ღვთის წყალობის, რომ სიმართლე გაირკვევა,“- ამბობს მეუფე დანიელი. მისი თქმით, მამა გრიგოლთან მას ბევრი კითხვა აქვს: „მაინტერესებს მისგან, დაფარვით ადამიანს ცოდვა მოეხსნება თუ არა?“. 

სასულიერო პირების ნაწილი აცხადებს, რომ მეუფე გრიგოლს ჭყონდიდის ეპარქიაში ვერ მიიღებენ: „ერი-ბერი დადგება და მგონი, ვერც მიიღებენ მაგას. ვერც იქნება მისაღები. მეუფე აბარებს ეპარქიას. ჩვენ ბერები მონასტერში ვილოცებთ, მაგრამ მასთან თანამწირველები ვერ ვიქნებით,“- აცხადებს ბერი მამა მათე. 

მეუფე პეტრეს განცხადებით, ის აპირებს მოღვაწეობას ერისა და ეკლესიის საკეთილდღეოდ და სულის საცხონებლად: „ ვიდრე მომავალი სინოდი არ მიიღებს ჩემი განკვეთის გადაწყვეტილებას ერისკაცობამდე, მანამ ვრჩები შეჩერებული ხარისხით. დანარჩენს არა აქვს მნიშვნელობა, ერთი საწყალი ბერი ვარ,“- განაცხადა მეუფე პეტრემ. 

ჭყონდიდის ყოფილი მიტროპოლიტი, მეუფე პეტრე მრევლს უკვე დაემშვიდობა.  პეტრე ცაავას დაარსებული სკოლა-გიმნაზიის პრორექტორი პროტესტის ნიშნად გადადგა. 

„რაც შეგვეძლო გავაკეთეთ, კარგი პროექტები განხორციელდა სკოლაში, მას შემდეგ რაც მეუფე პეტრე აღარ იქნება ეპარქის ხელმძღვანელი ჩემი ადგილი ამ სკოლაში არ არის,“- განაცხადა სკოლა-გიმნაზიის პრორექტორმა მამუკა დანელიამ. 

31 ოქტომბერს საპატრიარქოში სინოდის სხდომა გაიმართა. სხდომიდან პირველი პეტრე ცაავა გამოვიდა, რომელმაც თქვა, რომ პატრიარქმა ის მღვდელმთავრობიდან გადააყენა. მან ასევე განაცხადა, რომ „ერს ჰყავს პედარასტიის, მამათმავლობის ცოდვით შეპყრობილი სინოდის თავმჯდომარე“. მოგვიანებით მან ეს სიტყვები განმარტა. 

სინოდის სხდომის შემდეგ ცნობილი გახდა, რომ პეტრე ცაავა წალკელმა ეპისკოპოსმა მეუფე გრიგოლმა შეცვალა, ხოლო მეუფე იაკობს, რომელიც ამბობდა, რომ ყოფილი და მოქმედი მაღალჩინოსნები მას პატრიარქის გადაყენებაში დახმარებას სთხოვდნენ, მღვდელმთავრობა შეუნარჩუნდა. 

სინოდის სხდომა საერო ხელისუფლებამაც შეაფასა.