მეუფე გრიგოლი: ახლა რაც ხდება, დიდი განსაცდელი და გამოცდაა

ჭყონდიდის ახალი მიტროპოლიტის მეუფე გრიგოლის განცხადებით, მეუფე პეტრემ რაც თქვა, არ არის სიმართლე და ის ცდება. ასე გამოეხმაურა მეუფე გრიგოლი ჟურნალისტების კითხვას, რომელიც პატრიარქთან დაკავშირებით მეუფე პეტრეს ბრალდებებს ეხებოდა.

როგორც ჭყონდიდის ახალმა მიტროპოლიტმა აღნიშნა, მას სურს უმკურნალოს იმ სიტუაციას, მწუხარებას და სტრესს, რომელშიც ყველა იმყოფება.

,,იყო ასეთი ფილოსოფოსი და მეცნიერი ჰიპოკრატე, მისი ერთ-ერთი აფორიზმი არის „ნო ნოცერე“, რაც ნიშნავს „არ გააფუჭო“, „არ დააზიანო“. ასევეა პაციენტის მდგომარეობა და მე ვფიქრობ, რომ ამ აფორიზმით უნდა ვიცხოვრო. ძალიან ბევრია გაკეთებული ამ ეპარქიაში, ბევრი კეთდება და გაკეთდება. სპეციალურადაა ჩამოსული კომისია, ძალიან რთული სიტუაციაა, მაგრამ ვცდილობ მშვიდად, ლოცვა-კურთხევით გავაკეთოთ ყველაფერი და გაგრძელდეს ცხოვრება ამ ეპარქიაში. მადლობა მინდა ვუთხრა ყველას, ვინც ამ ეპარქიაში მოღვაწეობდა, მათ შორის მეუფე პეტრესაც. წმინდა მამები ამბობენ, შეიძლება ავაშენოთ ბევრი ეკლესია-მონასტერი, მაგრამ უფალმა არ დაგვაჯილდოვოს. უფალი აჯილოებს არა შრომას, არამედ თავმდაბლობას, რომელიც შრომიდან იბადება. მოწყალება, სიმშვიდე და სიყვარული ინებოს ღმერთმა“, - განაცხადა მეუფე გრიგოლმა.

ქადაგებისას მან ასევე სტრესის მნიშვნელობაზე ისაუბრა.

,,იყო ასეთი ფიზიოლოგი ანსელიე, რომელმაც დააფუძნა სწავლება სტრესის შესახებ. ახლა რაც ხდება, დიდი სტრესია. შეიძლება ასე ვთქვათ, სტრესი არის გემო, სიმწარე და არომატი ცხოვრებისა. სტრესი ეკლესიურად არის დიდი განსაცდელი და გამოცდა. ვინც მზად არის გამოცდისთვის, მას უხარია და ჩააბარებს ამ გამოცდას. გავა დრო და ჩვენ გავიხსენებთ ამ მოვლენებს და ეს სტრესი და ნერვიულობა შეიცვლება სიმშვიდით, ნუგეშით“, - განაცხადა მან.

წირვას მრევლთან ერთად ესწრებოდნენ სასულიერო პირები სხვადასხვა ეპარქიიდან. სწორედ მათი მონაწილეობით შეიქმნა კომისია, რომელმაც ეპარქიის გადაბარების პროცესი უნდა გააკონტროლოს. ასევე აქტუალურია კითხვა, ვინ რჩება და ვინ მიდის მეუფე პეტრესთან ერთად ჭყონდიდის ეპარქიიდან. რამდენიმე სასულიერო პირმა თავისი პოზიცია უკვე დააფიქსირა.

„მე დღეს დავტოვე მარტვილის წმინდა ნინოს მონასტრის წინამძღვრის პოზიცია. ჩემს შემცვლელად დედებმა ერთხმად აირჩიეს ერთ-ერთი მონაზონი, რომელსაც უკვე გადავაბარე უფლებამოსილება. მე ვთხოვე დედებს, რომ ჩვენი აშენებული მონასტერი არ მიატოვონ და გააგრძელონ მონაზვნური ცხოვრება. მე ჩემს მოძღვარს, მეუფე პეტრეს მივყვები“, - განაცხადა იღუმენია თამარ გამყრელიძემ.

31 ოქტომბერს სინოდის სხდომის შემდეგ ცნობილი გახდა, რომ პეტრე ცაავა წალკელმა ეპისკოპოსმა მეუფე გრიგოლმა შეცვალა, ხოლო მეუფე იაკობს, რომელიც ამბობდა, რომ ყოფილი და მოქმედი მაღალჩინოსნები მას პატრიარქის გადაყენებაში დახმარებას სთხოვდნენ, მღვდელმთავრობა შეუნარჩუნდა.

სხდომიდან პირველი პეტრე ცაავა გამოვიდა, რომელმაც თქვა, რომ პატრიარქმა ის მღდელმთავრობიდან გადააყენა. მან ასევე განაცხადა, რომ „ერს ჰყავს პედარასტიის, მამათმავლობის ცოდვით შეპყრობილი სინოდის თავმჯდომარე“. მოგვიანებით მან ეს სიტყვები განმარტა. 

პირველ ნოემბერს, მიტროპოლიტი გრიგოლ კაცია მის წინამორბედს მამა პეტრე ცაავას ჭყონდიდის ეპარქიაში შეხვდა. ცაავა ეპარქიას 17 წლის განმავლობაში ხელმძღვანელობდა, ამიერიდან კი, პატრიარქის გადაწყვეტილებით, ის შიომღვიმის ეკლესიაში განამწესეს. შეხვედრის დასრულების შემდეგ ცნობილი გახდა, რომ პატრიარქის ბრძანების მიუხედავად, პეტრე ცაავა შიომღვიმის მონასტერში არ წავა.