მეუფე გრიგოლი საკადრო ცვლილებებზე: ქირურგი ვარ, მაგრამ ქირურგიული ჩარევა არ მიყვარს

ჭყონდიდის ეპარქიაში გადაბარების პროცესთან დაკავშირებით სპეციალური კომისია შეიკრიბა. შეხვედრას ესწრებოდა ყოფილი მიტროპოლიტიც.  

9-კაციანი კომისია დღეს პირველად შეიკრიბა. მეუფე გრიგოლის განცხადებით, გადაბარების პროცესში მეუფე პეტრეც მონაწილეობს. 

„გაგრძელდება შეხვედრები, რომ ინვენტარიზაცია მოხდეს, თუმცა ბოლომდე არ დავრჩები. ალბათ უახლოეს დღეებში, საათებში წავალ“, - აღნიშნა მეუფე პეტრემ.

ვინ წავა და ვინ დარჩება ჭყონდიდის ეპარქიაში, ცნობილია იღუმენია თამარ გამყრელიძის და მამა ანდრია სარიას პოზიცია. ისინი ეპარქიაში დარჩენას არ აპირებენ.  

ახალმა მიტროპოლიტმა, მეუფე გრიგოლმა თქვა, რომ საკადრო ცვლილებები არ იგეგმება. 

„მიუხედავად იმისა, რომ ქირურგი ვარ, ქირურგიული ჩარევა არ მიყვარს“, - აღნიშნა ეპარქიის ხელმძღვანელმა. 

„ვეცნობით სიტუაციას და ვცდილობთ, რომ არ დაზიანდეს ის. კომისიაა ჩამოსული, არიან წარმომადგენლები საპატრიარქოდანაც, არქიმანდრიტი სერაფიმე, კომისიის თავმჯდომარე. რთული სიტუაციაა, მაგრამ ვცდილობთ, მშვიდად, წყნარად, ლოცვა-კურთხევით გავაკეთოთ ყველაფერი“, - განუცხადა ჟურნალისტებს მეუფე გრიგოლმა.  

ინჩხურის მონასტრის დათმობაზე პეტრე ცაავას თხოვნა არ დაკმაყოფილდა. პირველ ნოემბერს, მიტროპოლიტი გრიგოლ კაცია მის წინამორბედს მამა პეტრე ცაავას ჭყონდიდის ეპარქიაში შეხვდა. ცაავა ეპარქიას 17 წლის განმავლობაში ხელმძღვანელობდა, ამიერიდან კი, პატრიარქის გადაწყვეტილებით, ის შიომღვიმის ეკლესიაში განამწესეს.

შეხვედრის დასრულების შემდეგ ცნობილი გახდა, რომ პატრიარქის ბრძანების მიუხედავად, პეტრე ცაავა შიომღვიმის მონასტერში არ წავა და ინჩხურის მონასტრის დათმობა ითხოვა.

31 ოქტომბერს სინოდის სხდომის შემდეგ ცნობილი გახდა, რომ პეტრე ცაავა წალკელმა ეპისკოპოსმა მეუფე გრიგოლმა შეცვალა, ხოლო მეუფე იაკობს, რომელიც ამბობდა, რომ ყოფილი და მოქმედი მაღალჩინოსნები მას პატრიარქის გადაყენებაში დახმარებას სთხოვდნენ, მღვდელმთავრობა შეუნარჩუნდა.