მეუფე პეტრე ჭყონდიდის ეპარქიას დღეს დატოვებს

ჭყონდიდის ეპარქიის მიტროპოლიტობიდან გადაყენებული მეუფე პეტრე ეპარქიას დღეს დატოვებს. ამის შესახებ მან ჟურნალისტებს განუცხადა.

მეუფემ ასევე განაცხადა, რომ სინოდის სხდომას მხოლოდ იმ შემთხვევაში დაესწრება, თუ მას ტელეკომპანია „ერთსულოვნების“ პირდაპირ ეთერში გააშუქებენ.

„გაგიმხელთ, რომ 4 ნოემბერს ეპარქიიდან გავდივარ. სინოდის სხდომას თუ მოიწვევენ და გაშუქდება საპატრიარქოს არხის „ერთსულოვნების“ მეშვეობით, დავესწრები. თუ მიაჩნიათ წმინდა სინოდის წევრებს, რომ ერთსულოვნება გადაარჩენს საქართველოს, ერთსულოვნებისთვის ჯერ ბერში და შემდეგ ერში უნდა გადაიდგას ნაბიჯები ღიაობისა და გამჭვირვალობისთვის. წმინდა სინოდს არ უნდა ჰქონდეს საიდუმლო, ვინაიდან მღვდელმთავრები და სინოდის წევრები ურთიერთგამომრიცხავ განცხადებებს აკეთებენ და სიცრუეს ტირაჟირებენ. მიმაჩნია, რომ სინოდის სხდომები საპატრიარქოს არხის მეშვეობით, პირდაპირ ეთერში უნდა გაშუქდეს“, - განაცხადა მეუფე პეტრემ.

მეუფე პეტრე ამბობს, რომ თბილისში მიდის, თუმცა ჯერჯერობით ვერ აკონკრეტებს, რომელ ტაძარში განაგრძობს სასულიერო მოღვაწეობას. ამასთან ერთად, ბერ-მონაზვნებს რეზიდენციიდან გააქვთ მისი პირადი ნივთები, მათ შორის ბიბლიოთეკა, რომელიც, ცაავას თქმით, მისი საკუთრებაა. პეტრე ცაავას გარდა, მას შემდეგ, რაც სპეციალურად შექმნილი კომისია ინვენტარიზაციის პროცესს დაასრულებს, ეპარქიას იღუმენია თამარი და მამა ანდრია სარიაც დატოვებენ.

ჭყონდიდის ეპარქიაში გადაბარების პროცესთან დაკავშირებით სპეციალური კომისია შეიკრიბა.

პირველ ნოემბერს, მიტროპოლიტი გრიგოლ კაცია მის წინამორბედს მამა პეტრე ცაავას ჭყონდიდის ეპარქიაში შეხვდა. ცაავა ეპარქიას 17 წლის განმავლობაში ხელმძღვანელობდა, ამიერიდან კი, პატრიარქის გადაწყვეტილებით, ის შიომღვიმის ეკლესიაში განამწესეს.

შეხვედრის დასრულების შემდეგ ცნობილი გახდა, რომ პატრიარქის ბრძანების მიუხედავად, პეტრე ცაავა შიომღვიმის მონასტერში არ წავა და ინჩხურის მონასტრის დათმობა ითხოვა, თუმცა ინჩხურის მონასტრის დათმობაზე პეტრე ცაავას თხოვნა არ დაკმაყოფილდა.

31 ოქტომბერს სინოდის სხდომის შემდეგ ცნობილი გახდა, რომ პეტრე ცაავა წალკელმა ეპისკოპოსმა მეუფე გრიგოლმა შეცვალა, ხოლო მეუფე იაკობს, რომელიც ამბობდა, რომ ყოფილი და მოქმედი მაღალჩინოსნები მას პატრიარქის გადაყენებაში დახმარებას სთხოვდნენ, მღვდელმთავრობა შეუნარჩუნდა.