დეპუტატები უზენაესის მოსამართლეობის კანდიდატ ალექსანდრე წულაძეს უსმენენ

პარლამენტში, იურიდიულ საკითხთა კომიტეტში უზენაესი სასამართლოს მოსამართლეობის მეცხრამეტე კანდიტატს ალექსანდრე წულაძეს უსმენენ. მას, როგორც წინა კანდიდატს, სამოსამართლეო გამოცდილება არ აქვს, თუმცა 10 წლიანი მუშაობის სტაჟი გააჩნია მართლმსაჯულების სფეროში, იგი იუსტიციის უმაღლესი საბჭოს ყოფილი თანამშრომელი იყო და ამჟამად თბილისის საქალაქო სასამართლოს მედიატორია, ასევე კერძო იურიდიულ საქიანობას ეწევა.

უვადო მოსამართლეობის კანდიდატს დეპუტატები კითხვებს თავის პროფესიულ გამოცდილებასთან დაკავშირებით უსვამენ.

უმრავლესობის წევრის, დავით მათიკაშვილის კითხვაზე თუ რა პრობლემები აქვს ადვოკატს საქართველოში და რას გამოასწორებდა, წულაძის თქმით, მისთვის ძალიან მნიშვნელოვანია სასამართლოს სერვისის ხარისხი.

„ჩვენთვის, როგორც ასე ვთქვათ, სასამართლოს მომხმარებლებისთვის, მნიშვნელოვანია ამ ორგანოს სერვისისა და ადმინისტრირების ხარისხი, ანუ მენეჯმენტის ეფექტურობა. მნიშვნელოვანია სასამართლოში მედიაციის კანონის დამკვიდრება და ამ საკითხთან დაკავშირებით პროგრამა უკვე შემუშავებულია“, - აღნიშნა უზენაესის კანდიდატმა.

წულაძის მოსმენას კვლავაც არ ესწრებიან ოპოზიციის წარმომადგენლები და მოსმენაზე მხოლოდ მას შემდეგ შევლენ, როცა მათი კითხვის დასმის დრო მოვა. 

უზენაესი სასამართლოს მოსამართლეობის კანდიდატების მოსმენა საკანონმდებლო ორგანოში ხვალ, მეოცე კანდიტატის მოსმენით დასრულდება. 

იურიდიულ საკითხთა კომიტეტმა უზენაესი სასამართლოს მოსამართლეობის კანდიდატების მოსმენა 23 სექტემბერს დაიწყო. 

წინა დღეებში პარლამენტის იურიდიულ კომიტეტში უზენაესი სასამართლოს უვადო მოსამართლეობის კანდიდატებს: შოთა გეწაძეს, მერაბ გაბინაშვილს, თამარ ალანიას, მირანდა ერემაძეს, მამუკა ვასაძეს, მაია ვაჩაძეს, თამარ ზამბახიძეს, შალვა თადუმაძეს, ზაზა თავაძეს, ვლადიმერ კაკაბაძეს, გიორგი მიქაუტაძეს, პაატა სილაგაძეს, ნუგზარ სხირტლაძეს, ლალი ფაფიაშვილს, ნინო ქადაგიძეს , ლაშა ქოჩიაშვილს და ქეთევან ქადაგიძეს მოუსმინეს.