ცქიტიშვილი: ასეთი სახის აგრესიის გამოხატვა სრულიად მიუღებელია

ჩვენთვის მნიშვნელოვანია ტრადიციული ფასეულობების დაცვა, თუმცა ერთ-ერთი ტრადიციული ფასეულობა არის ასევე ურთიერთპატივისცემა იმ ქრისტიანული ტოლერანტობის და ადამიანის თავისუფლების ხაზგასმა, რომელიც ასევე ჩვენი კულტურის ნაწილია, - ამის შესახებ ვიცეპრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა ფილმის „და ჩვენ ვიცეკვეთ“ კინოთეატრებში ჩვენებისას განვითარებული მოვლენების შეფასებისას განაცხადა.

„ნებისმიერი სახის ძალადობა ვერ იქნება მისაღები და, რა თქმა უნდა, დასაგმობია. მინდა მადლობა გადავუხადო პოლიციას იმისთვის, რომ რამდენიმე საათის განმავლობაში იცავდნენ ჩვენი თანამოქალაქეების სიმშვიდეს და მათ შორის დაპირისპირების საშუალებას არ აძლევდნენ მხარეებს, შესაბამისი რეაგირებაც იყო ძალადობის ფაქტებზე. 27 დაკავებული საკმაოდ დიდი რაოდენობაა.

გარდა ამისა, რამდენიმე ფაქტზე მიმდინარეობს გამოძიება და უნდა ველოდოთ ამაზეც შესაბამის რეაგირებას. ასეთი სახის აგრესიის გამოხატვა სრულიად მიუღებელია, ჩვენ ვართ სამართლებრივი სახელმწიფო, რომელშიც ძალიან მკაფიოდ არის დაცული როგორც გამოხატვის თავისუფლება, ასევე აზრის თავისუფლებაც. ჩვენთვის მნიშვნელოვანია ტრადიციული ფასეულობების დაცვა, თუმცა ერთ-ერთი ტრადიციული ფასეულობა არის ასევე ურთიერთპატივისცემა იმ ქრისტიანული ტოლერანტობის და ადამიანის თავისუფლების ხაზგასმა, რომელიც ასევე ჩვენი კულტურის ნაწილია“, - განაცხადა ცქიტიშვილმა.

8 ნოემბერს განვითარებული მოვლენების შეფასებისას ომბუდსმენმა განაცხადა, რომ უმჯობესი იქნებოდა, პოლიციას კორდონი უფრო შორს მოეწყო. 

შინაგან საქმეთა სამინისტრომ ფილმის ჩვენებისას საპროტესტო აქციების დროს მომხდარ ინციდენტებთან დაკავშირებით გამოძიება 4 ფაქტზე დაიწყო. 

კინოთეატრებთან 8 ნოემბერს გამართული აქციის პარალელურად ფილმმა „და ჩვენ ვიცეკვეთ“ მინსკის კინოფესტივალზე მორიგი ჯილდო მიიღო. 

პრემიერის ჩაშლით „ქართული მარში, ბიზნესმენი ლევან ვასაძე და ბავშვთა უფლებების დაცვის საზოგადოების თავმჯდომარე გურამ ფალავანდიშვილი იმუქრებოდა. „ქართული მარშის“ წევრებმა ლგბტ თემის დროშაც დაწვეს. 

თბილისის პარალელურად ბათუმში კინოთეატრ „აპოლოსთან“ ვითარება დაიძაბა. ფილმის „და ჩვენ ვიცეკვეთ“ მოწინააღმდეგეები შენობაში შეჭრას შეეცადნენ.

ადმინისტრაციულ სამართალდარღვევათა კოდექსის 173-ე (სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობა) და 166-ე (ხულიგნობა) მუხლებით გათვალისწინებული სამართალდარღვევის ფაქტებზე სულ დაკავებულია 27 პირი, მათ შორის 24 - თბილისში, 3 - ბათუმში.

ქართველი გეი წყვილის სიყვარულზე გადაღებული, ლევან აკინის ფილმის „და ჩვენ ვიცეკვეთ“ პრემიერა წელს, კანის კინოფესტივალზე გაიმართა. ფილმმა ფესტივალის 10 საუკეთესო ფილმს შორის მეშვიდე ადგილი დაიკავა. ნამუშევარი ჩიკაგოს კინოფესტივალზე საუკეთესო უცხოენოვან ფილმად დასახელდა. 

ფილმის მონაწილე მსახიობი კი კანის ფესტივალის ერთ-ერთ აღმოჩენად აღიარეს. გეი სიყვარულზე გადაღებული ქართულ-შვედური ფილმი „ოსკარზეც“ წარადგინეს. 

ტრეილერი შეგიძლიათ, ამ ბმულზე ნახოთ.